Gazeta RD
U dënua me 2.8 vite burg nga Shkalla e Parë, zgjidhet trupa në Apel që do shqyrtojë ankimin e Vangjush Dakos
Gjykata e Posaçme e Apelit ka zgjedhur gjyqtarin që do të vendos nëse do e dënojë ose jo ish-kryebashkiakun e Durrësit Vangjush Dako por ende nuk ka një datë për gjyqin. Ankimi i tij do të shqyrtohet nga gjyqtari Engert Pëllumbi, i caktuar me short.
Shkalla e Parë e shpalli fajtor Vangjush Dakon më 25 nëntor të vitit të kaluar, duke e duke e dënuar përfundimisht me 2 vite e 8 muaj për shpërdorim detyre e kryer në bashkëpunim në dy episode. Dako u la për disa muaj në arrest në burg, por më pas Shkalla e Parë për shkak të tejkalimit të afateve të hetimit, e çoi në arrest shtëpie, masë në të cilën ndodhet edhe aktualisht.
Në përfundim të shqyrtimit gjyqësor që u zhvillua me procedurën e gjykimit të shkurtuar, gjyqtarja Elsa Ulliru vendosi deklarimin fajtor të Dakos për veprën penale “Shpërdorimi i detyrës”, kryer në bashkëpunim për faktin penal të ndërtimit të pallatit të ndërtuar nga shoqëria “Fakle” sh.p.k. dhe dënimin e tij me 2 vite e 9 muaj burgim. Për të njëjtën vepër penale u dënua me 2 vjet e 4 muaj burgim për projekt-zbatimin e promenadës bregdetare dhe në bashkim të dënimeve u dha masa 4 vjet burg, që në aplikim të gjykimit të shkurtuar u reduktua në 2 vjet e 8 muaj heqje lirie. Po ashtu, u caktua dhe dënimi plotësues për heqjen e të drejtës për të ushtruar funksione publike për një periudhë prej 5 vitesh.
Fajtorë u deklaruan dhe tre te pandehurit Arsuan Bulku, Fatmir Ejupi dhe Fiqiri Farruki, të akuzuar për falsifikim, të cilët u dënuan përfundimisht me nga 2 vjet burg. Dënimet e tyre u pezulluan dhe u vendosën në shërbim prove për 4 vjet.
Dako u hetua nga SPAK për veprime në kundërshtim me kompetencat e kryetarit të bashkisë në miratimin e lejes së ndërtimit në favor të shoqërisë Fakle sh.p.k, pasi ai dhe vartësit e tij i përpiluan dokumentet dy vjet pasi ndërtimi kishte përfunduar dhe banorët banonin në pallatin në fjalë.
Hetimi arrin në përfundimin se është bërë legalizimi i një objekti shumëkatësh, të ndërtuar pa leje, ndërkohë që dhe vetë ndërtimi nuk është bërë sipas projektit të paraqitur nga ndërtuesi dhe të miratuar nga bashkia.
Fakti i dytë penal për të cilin prokuroria akuzon Dakon ka të bëjë me një procedurë prokurimi, për shërbim konsulence, sigurimin e një projekti të quajtur “Projektim zbatim për Promenadën Bregdetare dhe Plazhin publik nga Bërryli deri në Currila”. Sipas SPAK, komisioni i ngritur me urdhër të Dakos, ka kryer gabim llogaritjen e fondit limit, me një vlerë gati dhjetë herë më shumë se ajo që duhet të llogaritej në bazë të Vendimit të Këshillit të Ministrave.
