Gazeta RD
Partia Demokratike ka reaguar pas sulmit të kryesocialistit Edi Rama ndaj kryetares së PD të Degës 9 në Tiranë. Përmes zëdhënëses së selisë blu, Floriana Garo, PD thotë se fundi i regjimit ëshët i afërt, ndërsa ai do t’i vijë nga gratë.
Në një video-mesazh, Garo tha se sulmi ndaj kryetares së degës 9 të Partisë Demokratike, Eda Grimci është një pasqyrë e qartë e një modeli politik të dështuar, që përpiqet të mbijetojë përmes përçarjes, frikës dhe nënçmimit, veçanërisht ndaj grave që guxojnë të jenë aktive në jetën publike.
Deklarata e zëdhënëses së PD, Floriana Garo:
Dje ishte radha e një tjetër gruaje që të bëhej objekt i një sulmi verbal, agresiv dhe të ulët nga një kryeministër që, në vend të udhëheqë me dinjitet, zgjedh të fyejë dhe të poshtërojë.
Sulmi i Edi Ramës ndaj kryetares së degës 9 të Partisë Demokratike, znj. Eda Grimci, nuk është thjesht një devijim etik. Është një pasqyrë e qartë e një modeli politik të dështuar, që përpiqet të mbijetojë përmes përçarjes, frikës dhe nënçmimit, veçanërisht ndaj grave që guxojnë të jenë aktive në jetën publike.
Eda Grimci është një grua e zonja, një nënë, një qytetare e ndershme, dhe një demokrate që përfaqëson më së miri aspiratat e Njësisë 9 për ndryshim. Sulmi ndaj saj është sulm ndaj çdo gruaje që ka vendosur të mos heshtë më përballë padrejtësisë dhe arrogancës së pushtetit.
U bëj thirrje qytetarëve të refuzojnë këtë politikë përçarëse bullizimi. Mjaft më me patronazhizmin dhe talljet.
Mjaft më me një kryeministër që ka frikë nga gratë e zonja, të forta dhe me integritet.
Edi Rama, fundi i këtij regjimi nuk po vjen nga burrat që i sulmon ditë për ditë, por nga gratë që nuk do të mund t’i ndalosh dot më.
