Berisha: Do të bëjmë gjithçka për çlirimin e vendit nga bandat kriminale dhe vrasësit!

Kryetari i PD, Sali Berisha ka reaguar për dy atentatet në Lezhë e Tiranë që tronditën vendin mbrëmjen e djeshme. Nga Kruja, gjatë takimit me bizneset artizanale, Berisha tha se, masakrat që lënë pas ngjarjet kriminale kanë vetëm një emëri, Edi Rama, që sipas Berishës është kryesocialisti që i ndërsen.

Me rritjen e pasigurisë publike, lideri demokrat Sali Berisha premtoi çlirimin e vendit nga bandat kriminale dhe vrasësit.

Berisha tha se, ne do bëjmë ligjin dhe ata të cilët përzihen, i lutem shumë çdo qytetari të mbajë shënim personin që u bën presion dhe u kërcënon për votën, absolutisht do shpallet terrorist pas këtyre zgjedhjeve. Pas këtyre zgjedhjeve ai do listohet si terrorist dhe do trajtohet si terrorist.

“Ndaj u bëj thirrje qytetarëve të Krujës, pavarësisht nga bindjet politike, nuk është çështja për PD-në këtu apo për ndonjë parti tjetër, çështja është në radhë të parë për xhepin tënd, për pensionin tënd, për rrogën tënde, për biznesin tënd.

Krujës i premtoj investimet më serioze, me ujësjellësin, në lidhjen me Tiranën, në zonat turistike të cilat nuk arrihen dot.

I premtoj çlirimin e çdo centimetri katror të këtij vendi nga banditët, nga vrasësit, nga gjobëvënësit.

Ju e morët vesh, nga një masakër në një masakër tjetër.

Mbrëmë rrugët e Tiranës u skuqën, 4 vetë morën breshëri dhe gjer tani narkoshteti nuk është në gjendje të thotë se çfarë ishin ato, por kurrë nuk mund të gjuhej mbi një 11-vjeçar.

Mirëpo njeriu që i ndërsen dhe u thotë hani kokën njëri-tjetrit, por më shërbeni mua, krijon këtë situatë.

Ne do bëjmë ligjin dhe ata të cilët përzihen, i lutem shumë çdo qytetari të mbajë shënim personin që u bën presion dhe u kërcënon për votën, absolutisht do shpallet terrorist pas këtyre zgjedhjeve. Pas këtyre zgjedhjeve ai do listohet si terrorist dhe do trajtohet si terrorist. Ne do bëjmë ligjin!”, tha Berisha.