Gazeta RD
Kryetari i PD për qarkun Kukës, Rrahman Demaj e cilësoi këtë proces zgjedhor si historik dhe theksoi se fitorja e opozitës është një domosdoshmëri për të shpëtuar vendin nga një narkodiktaturë.
Demaj akuzoi qeverinë për dështime në ekonomi, arsim, shëndetësi dhe luftë kundër korrupsionit. Ai tha se Kukësi, Hasi dhe Tropoja mbeten simbole të qëndresës dhe patriotizmit. Në fund, ai u shpreh i bindur se Kukësi do të mbetet përjetë bastion i palëkundur i PD-së.
Demaj: Të nderuar të pranishëm, zgjedhjet e 11 majit janë zgjedhje të një rëndësie historike e si e tillë fitorja e Partisë Demokratike dhe Aleancës për Shqipërinë Madhështore është jo thjesht nevojë për rotacion pushteti, por është domosdoshmëri pasi shqiptarët sot drejtohen nga një bandë kriminale e cila ka instaluar në Shqipëri një narkoshtet i cili po tenton të instalojë në Shqipëri një narkodiktaturë, e ne këtë nuk e mund ta lejojmë pasi jemi forca politike e cila sollëm pluralizmin, demokracinë dhe shtetin ligjor.
Gjatë këtyre 12 viteve të fundit, qeveria e Rilindjes e ka renditur Shqipërinë të fundit në rajon për nga pensionet dhe rrogat, për sa i përket cilësisë së arsimit dhe shërbimit shëndetësor, të fundit për luftën kundër korrupsionit dhe krimit të organizuar.
Shqipëria radhitet e 4-ta për shpopullimin, për vjedhjen dhe varfërimin e qytetarëve të saj, por Kukësin, Hasin, Tropojën, nuk e mposht as varfëria, as harresa, sepse në këto troje rreh një zemër shqiptare që nuk pushon kurrë së dashuri atdheun.
PD dhe doktor Berisha në qendër të vëmendjes kanë qytetarin, kjo e mishëruar më së miri në programin e saj, garant i të cilit është lideri ynë profesor doktor Sali Berisha, burrë i mbajtjes së fjalës së dhënë.
Në përfundim të fjalës sime, unë e siguroj liderin e PD Sali Berisha se qarku i Kukësit ka qenë, është dhe do të mbetet përjetë, bastion i palëkundur i Partisë Demokratike.
