Gazeta RD
FBI po heton ish-drejtorin e CIA-s, John Brennan, dhe ish-drejtorin e FBI-së, James Comey, lidhur me deklarata të mundshme të rreme dhënë Kongresit. Hetimi ka nisur pas një referimi nga drejtori aktual i CIA-s, John Ratcliffe, sipas një burimi të njohur me këtë çështje.
Ky referim erdhi pasi Ratcliffe publikoi javën e kaluar një rishikim kritik ndaj vlerësimit të komunitetit amerikan të inteligjencës të vitit 2016. Ky vlerësim, i kritikuar prej kohësh nga Presidenti Donald Trump dhe aleatët e tij, kishte arritur në përfundimin se Presidenti rus Vladimir Putin kërkoi të ndikonte zgjedhjet në favor të Trump.
Në një postim në platformën X, Ratcliffe deklaroi se rishikimi i ri tregoi që vlerësimi i vitit 2016 ishte hartuar “përmes një procesi atipik dhe të korruptuar” në kohën kur agjencitë drejtoheshin nga Brennan dhe Comey, në një mjedis të ngarkuar politikisht.
Megjithatë, rishikimi nuk e hodhi poshtë thelbin e konstatimeve të komunitetit të inteligjencës – se Putin preferonte Trump ndaj Hillary Clinton – por kritikoi mënyrën sesi udhëheqësia e atëhershme e agjencive, sipas raportit, kishte nxituar për të arritur konsensus dhe kishte kufizuar debatin analitik. Brennan akuzohet se “sinjalizoi” paraprakisht një marrëveshje mes drejtuesve të agjencive përpara se të përfundonte dokumenti përfundimtar (ICA).
Aktualisht nuk është e qartë nëse hetimi i FBI-së, i raportuar fillimisht nga Fox News, ka kaluar përtej fazës paraprake.
Një zëdhënës i Departamentit të Drejtësisë deklaroi se nuk komenton mbi hetime në zhvillim. CIA po ashtu refuzoi të komentojë, ndërsa as përfaqësuesit e Brennan dhe Comey nuk pranuan të japin reagim.
Të mërkurën, Trump u tha gazetarëve në Shtëpinë e Bardhë se nuk ishte në dijeni të këtij hetimi, por përsëriti akuzat e tij duke i quajtur Brennan dhe Comey “njerëz shumë të pandershëm”.
Në qendër të kësaj çështjeje qëndrojnë deklaratat e ish-drejtorëve në Kongres mbi hetimin e ndërhyrjes ruse në zgjedhjet e vitit 2016 dhe mbi vendimin për të shqyrtuar pretendimet e dosjes Steele – një dokument i hartuar nga ish-oficeri britanik i inteligjencës, Christopher Steele, dhe i financuar nga fushata e Hillary Clinton, ku pretendohej se kishte lidhje mes fushatës së Trump dhe qeverisë ruse.
Raporti i CIA-s i muajit të kaluar argumenton gjithashtu se Brennan kufizoi qasjen në informacione kyçe dhe u fokusua më shumë te ruajtja e një narrative të qëndrueshme politike sesa te saktësia analitike, pavarësisht kundërshtimeve të brendshme që përfshinin edhe informacionin e dosjes Steele.
