Gazeta RD
Kompania Air Albania që përdorej nga Rama për qindra fluturime private me të cilat është akuzuar nga Kryetari i PD, Berisha se ka transportuar kokainë dhe para ka falimentuar dhe asaj i janë bllokuar avionët.
Kompania ajrore “Air Albania” është zhytur në një krizë të thellë financiare. Ajo nuk i ka deklaruar bilancet prej 6 vjetësh, një veprim pas të cilit ka dyshime se fshihen një sërë skandalesh, përfshirë mbulimi i shpenzimeve të avionit “charter” me emrin Ismaili, që kryeministri Edi Rama e ka përdorur prej vitesh si taksi, për takime nga më të rëndomtat.
Por sa më shumë i fsheh bilancet, aq më shumë po dalin në sipërfaqe problemet. Lajmet se “Air Albania” po falimenton ka shqetësuar më së shumti borxhlinjtë e kompanisë, që kanë nisur t’i kërkojnë të shlyejë detyrimet.
Faqja zviceriane e specializuar për çështjet e aviacionit “Ch-Aviation” bëri të ditur se “Air Albania” është paditur në gjykatë nga një kompani që i ka dhënë avionët me qira. Sipas saj, kompania shqiptare nuk i ka paguar qiranë e avionëve.
“Ch-Aviation” nuk e ka publikuar emrin e kompanisë dhe as se në ç’gjykatë është bërë padia.
Por ajo që është e qartë është se kreditorët dhe qiradhënësit kanë nisur t’i mbledhin borxhet në forma ligjore, pasi kompania e themeluar nga Sinan Idrizi, mik i Edi Ramës dhe presidentit turk Edrogan dhe “Turkish Arlines”, nuk ka më para për t’i paguar.
Muajin e kaluar, sipas raportimeve mediatike, një prej avionëve të “Air Albania”, dhënë me qira nga kompania ajrore “Etihad”, u sekuestruar në aeroportin e Stambollit. Nuk është e qartë nëse bëhet fjalë për avionin “charter” që përdorej nga Edi Rama apo për ndonjë tjetër mjet, mes 4 të tillëve që ka “Air Albania”.
Po ashtu, aeroporti i Lubjanës njoftoi pak ditë më parë se “Air Albaia” i kishte anuluar fluturimet nga Tiranë-Lubjanë-Tiranë, për shkak të problemeve financiare.
Që prej themelimit, për “Air Albania” u hodhën dyshime për qëllimet e themelimit. Kjo për shkak se marrëveshje nuk u bë asnjëherë transparente dhe për faktin se njëri prej aksionerëve ishte mik i ngushtë i Edi Ramës dhe Rexhep Taip Erdogan.
Kompania Air Albania, e themeluar më 2018, është në zotërim të Turkish Airlines që ka 49% të aksioneve, kompanisë MDN Investment të biznesmenit Sinan Idrizi që ka 41% të aksioneve dhe kompanisë shtetërore ALBCONTROL që zotëron 10% të aksioneve.
Zoom.al ka raportuar se kompania ka shërbyer si mbulesë e përdorimit të avionit “charter” me emrin Ismaili nga kryeministri Edi Rama për udhëtime shtetërore e private. Faturat e këtyre fluturimeve, që i kalojnë 150, nuk janë bërë kurrë publike. Edhe marrëveshja mes qeverisë dhe kompanisë “Air Albania” mbahet sekret. Zoom.al i ka kërkuar disa herë Drejtorisë së Shërbimeve Qeveritare të bëjë transparencë mbi kontratën, por ajo ka refuzuar. Edhe kërkesat e opozitës për këtë çështje janë hedhur në “koshin e plehrave”.
Sipas denoncimeve të opozitës, fatura e përdorimit të këtij avioni nga Edi Rama shkon në mbi 22 milionë euro, ndërsa borxhet e kompanisë, sipas “Turkish Arilines” janë në rreth 30 milionë euro.
Kryeministri ka deklaruar se “Air Albania” ia ka vënë avionin në dispozicion në këmbim të promovimit që ai i bën kompanisë, si imazh i saj. Por 22 milionë euro për marketing duket një shumë tepër e majme, veçanërisht për një kompani që ka vetëm 4 avionë dhe që ka 30 milionë euro borxhe.
