Gazeta RD
Këshilltarët socialistë të Këshillit Bashkiak të Tiranës u thirrën këtë të martë në selinë rozë për të marrë direktivat për shkarkimin e Erion Veliajt nga posti i kryebashkiakut.
Mbledhja u drejtua nga kryetarja e Këshillit Bashkiak, Megi Fino dhe zgjati rreth 1 orë e 30 minuta, ku u formulua dhe u firmos teksti i kërkesës për shkarkimin e Veliajt, i cili do të bazohet në argumentin e mungesës së tij prej më shumë se 3 muajsh.
Burime për mediat bëjnë me dije se se rezistencë për të firmosur kërkesën ka bërë këshilltari Aldo Mërkoçi, (ish kreu i MJAFT dhe këshilltar i Arbjan Maznikut), edhe pse në fund ka hedhur firmën së bashku me të gjithë kolegët e tij.
Merkoçi ka kërkuar që në deklaratë të shënohet se Veliaj i ka shërbyer qytetit dhe fjalë të tjera për punën e tij të mirë dhe kërkesa i është marrë parasysh.
Në përfundim të mbledhjes u vendos që Këshilli Bashkiak të mblidhet ditën e martë, 23 shtator, në orën 16:00, për të votuar për shkarkimin e Erion Veliajt.
