Imazhi i Shqipërisë sot në botë/ BBC: Vrasja e gjyqtarit, tronditje dhe tensione me drejtësinë

Ngjarja e rëndë që ndodhi ditën e hënë në Gjykatën e Apelit në Tiranë, ku Astrit Kalaja u qëllua për vdekje brenda sallës së gjyqit nga një person i përfshirë në procesin gjyqësor, ka marrë vëmendje edhe nga mediat ndërkombëtare.

BBC, raporton se ‘vrasja ka ndodhur në një moment kur tensionet lidhur me konfliktet e pronësisë, zvarritjet e proceseve dhe besimi ndaj sistemit gjyqësor janë ende të larta’.

“Një ngjarje e rëndë tronditi drejtësinë shqiptare të hënën, kur gjyqtari Astrit Kalaja u qëllua për vdekje gjatë një seance gjyqësore në Gjykatën e Apelit në Tiranë. Ngjarja ndodhi në një sallë gjyqi gjatë shqyrtimit të një mosmarrëveshjeje pronësie, ku një person i armatosur hapi zjarr ndaj gjyqtarit dhe palëve të përfshira në çështje.

Zyrtarët konfirmuan se gjyqtari Kalaja ndërroi jetë gjatë rrugës për në spital, ndërsa dy persona të tjerë – baba dhe bir, u plagosën, por ndodhen jashtë rrezikut për jetën.

Policia arrestoi menjëherë autorin e dyshuar, një 30-vjeçar me inicialet E. Sh., të identifikuar nga mediat si Elvis Shkëmbi. Sipas raportimeve, ai dyshohet se qëlloi pasi kishte frikë se do të humbiste çështjen gjyqësore.

Sipas burimeve zyrtare, xhaxhai i të dyshuarit dhe roja i sigurisë së gjykatës janë gjithashtu arrestuar në lidhje me ngjarjen”, shkruan BBC.