Gazeta RD
Ola XAMA
Pjesa më e madhe e kompanive publike rezultojnë me humbje dhe shumica e tyre janë të zhytura në borxhe.
Kronos në MCN TV ka analizuar bilancet e ndërmarrjeve shtetërore më të rëndësishme, nga ku del se thuajse të gjitha paraqesin vështirësi financiare, përfshirë dhe ato që dikur kanë qënë të shëndetshme.
Kompanitë e sektorit energjitik vijojnë të zhytura në borxhe të ndërsjella që kapin vlerën 1.7 miliard euro, kreditë për disa prej tyre po paguhen nga buxheti i shtetit dhe vitet e fundit qeveria ka injektuar para në këto ndërmarrje.
Situata është e ngjashme dhe në ndërmarrjet e ujësjellësit, disa prej të cilave dhe pse u reformuan kanë vështirësi të paguajnë faturat korrente.
Edhe sektori i naftës dhe transportit është njësoj. Miratohen plane ekonomike të cilat që në fillim të vitit destinojnë që kompanitë të dalin me humbje. Emërimet politike, abuzimet me fondet publike dhe mungesa e transparencës ka zhytur në humbje këto kompani.
Në kontrast të kësaj tabloje qeveria ka shpallur nisma për të themeluar kompani në çdo sektor: bankë me kapital shtetëror, Korporatën e Investimeve në fushën e zhvillimit të pasurive të patundshme, agjenci kombëtare për mirëmbajtjen e rrugëve, kompani për menaxhimin e mbetjeve urbane, ndërmarrje publike në fushën e importit dhe shpërndarjes së karburanteve…
Një pjesë e mirë e këtyre firmave kanë funksione dubluese me agjencitë publike. Rast ilustrues është ai i një kompanie në pronësi të Bashkisë Tiranë, e cila ka drejtor të përgjithshëm, drejtor finance, drejtor burimesh njerëzore dhe një bord, të cilët komandojnë dy punonjës.
Ndërmarrjet publike janë kthyer në agjenci punësimi për qëllime elektorale. Nga kryqëzimi i të dhënave të listës së pagave që rrodhi në vitin 2021 me atë të patronazhistëve, rezulton se afro 70% e të punësuarëve në këto kompani votojnë Partinë Socialiste.
