SHBA fundos nëndetësen me droge nga Venezuela/ Pentagoni ngre task forcën për luftën ndaj karteleve

Ushtria amerikane ka marrë në paraburgim dy të mbijetuar pasi u shpëtuan pas një sulmi me dron të enjten ndaj një nëndetëseje të dyshuar për kontrabandë droge në Karaibe, tha një zyrtar i Marinës për Fox Neës.

Dy zyrtarë amerikanë i thanë Associated Press se sulmi ishte i gjashti i kryer nën administratën Trump, ndërsa ajo vazhdon të synojë anijet e kontrabandës të operuara nga kartelet e drogës.

Anija ishte një nëndetëse, e lidhur prej kohësh me tregtinë e drogës, e cila ndodhet pak poshtë vijës së ujit. Dy të mbijetuarit ishin në bordin e një anijeje luftarake amerikane, shtoi zyrtari.

Presidenti Donald Trump më vonë e konfirmoi sulmin.

“Ne sulmuam një nëndetëse, dhe ajo ishte një nëndetëse që mbante drogë e ndërtuar posaçërisht për transportimin e sasive masive të drogës,” tha Trump të premten ndërsa priti presidentin ukrainas në Shtëpinë e Bardhë.

Sekretari i Shtetit Rubio nuk e kundërshtoi faktin se kishte të mbijetuar, por ai tha vazhdimisht se detajet do të jepeshin më vonë.

Incidenti i së enjtes shënon rastin e parë të njohur të të mbijetuarve të raportuar që kur forcat amerikane filluan fushatën e tyre të sulmeve vdekjeprurëse kundër anijeve të dyshuara për drogë.

Nuk ishte menjëherë e qartë se çfarë do të bëhej me individët. Fox Neës Digital ka kontaktuar departamentet e Shtetit dhe të Luftës për komente.

Goditja e së enjtes e çon numrin e të vdekurve nga fushata ushtarake e administratës Trump kundër anijeve në rajon në të paktën 28. Operacionet filluan muajin e kaluar dhe janë pjesë e përpjekjes më të gjerë të Trump për të shpërbërë kartelet transnacionale me forcë.

Të premten, Sekretari i Luftës Pete Hegseth njoftoi një Task Forcë të re të Përbashkët kundër narkotikëve brenda Komandës Jugore të SHBA-së.

Task forca synon të “shkatërrojë kartelet, të ndalojë helmin dhe ta mbajë Amerikën të sigurt”, shkroi Hegseth javën e kaluar në X, më parë Tëitter. “Mesazhi është i qartë: Nëse trafikoni drogë drejt brigjeve tona, ne do t’ju ndalojmë menjëherë”.

Të martën, Trump theksoi një sulm të veçantë që vrau gjashtë kontrabandistë të dyshuar në bordin e një anijeje në brigjet e Venezuelës.

“Venezuela është një furnizues i madh i drogës”, u tha Trump gazetarëve më vonë atë ditë në Zyrën Ovale, duke akuzuar vendin se po dërgonte “kriminelët” e saj në Shtetet e Bashkuara.