Zyrtari i lartë amerikan takim me deputetët e opozitës në Tiranë

Deputetët e opozitës kanë zhvilluar muajin e kaluar një takim me Drejtorin për Çështjet e Europës Perëndimore Qendrore në Departamentin e Shtetit, Mark Fleming, si edhe me të ngarkuarën me punë në Ambasadën Amerikane në Tiranë, Nancy Van Horn.

Takimi u realizua gjatë vizitës së Fleming në Shqipëri, ku ai u fokusua në diskutime me përfaqësues nga i gjithë spektri politik. Në njoftimin e saj në rrjetet sociale, Ambasada Amerikane theksoi se pas përfundimit të mbylljes së qeverisë amerikane për shkak të fondeve buxhetore, puna e saj po vijon normalisht dhe se bashkëpunimi me palën shqiptare mbetet prioritet.

Në takimin me opozitën, drejtori Fleming u përqendrua te forcimi i partneritetit SHBA–Shqipëri, rritja e bashkëpunimit për çështjet e sigurisë dhe përforcimi i përpjekjeve të përbashkëta kundër organizatave kriminale ndërkombëtare.