Gazeta RD
Luftar Hysa, biznesmeni i sanksionuar nga SHBA ka edhe një urdhër arresti dhe nga Prokuroria e Posaçme kundër Korrupsionit dhe Krimit të Organizuar SPAK. Fillimisht lajmi u raportua nga një shkrim në median meksiane ‘Zetatijuana’, ku thuehj se vetë Hysa nga viti 2024 ka paraqitur padi dhe urdhra ndalimi për të kundërshtuar ekstradimin e tij drejt Shqipërisë. Ndërkohë sa i përket një hetimi të nisur edhe nga Shqipëria për biznesmenin SPAK e ka pohuar, ndërsa shprehet për ‘Oranews’ se në këtë fazë nuk ka asgjë për të komunikuar me publikun.
SPAK në këtë fazë hetimi nuk ka deklaruar ende se për cilin rast kërkohet arrestimi i Hysës apo akuzat që rëndojnë nga Autoritetet shqiptare, ndërsa ajo që raportohet nga mediat meksiaken është se në nëntor të 2024, Gjykata e Qarkut të Gjashtë për Çështje Penale në Nuevo León ka pranuar paraprakisht kërkesën e biznesmenit shqiptar për të shmangur ekstradimin në Shqipëri. Por gjithsesi, gjyqi është përsëri në zhvillim e sipër dhe do t’i takojë gjykatës së shkallës së parë të përcaktojë nëse urdhri i kontestuar shkeli të drejtat kushtetuese.
Në 13 nëntor Departamenti Amerikan i Thesarit sanksionoi Luftar Hysën, familjarët e tij dhe bizneset e lidhura me ta me akuza se kanë pastruar paratë e kartelit të drogës ‘Sinaloa’. Luftar Hysa dhe familjarët e tij u shpallën “Non Grata” dhe iu bllokuan asetet, duke goditur edhe rrjedhën financiare ndërkombëtare të supozuar të grupit, në veprimtarinë e dyshuar të pastrimit të parave të drogës një pjesë e të cilave mendohet se mund të jetë investuar edhe në Shqipëri.
