Këlliçi: 82 votat e turpit kundër Shqipërisë! Mbrojtja e Ballukut mbi drejtësinë dhe Shqipërinë!

Ne një reagim në rrjetet e tij sociale, deputeti i PD-së, Belind Këlliçi, u shpreh se “82 votat e turpit janë kundër Shqipërisë!”.

Ai akuzoi kryeministrin Edi Rama se me votën e sotme ngriti një sulltanat privat në Kuvend, duke mbrojtur imunitetin e ish-zëvendëskryeministres Belinda Balluku dhe duke shkelur hapur drejtësinë, integrimin europian dhe parimin e barazisë para ligjit.

Këlliçi shkruan se, ky është momenti kur qeveria tregoi se mbrojtja e korrupsionit është më e rëndësishme se interesi i vendit dhe se qytetarët nuk do të lejojnë që Shqipëria të rrëshqasë drejt një regjim hajdutërie.

Reagimi

82 votat e turpit, kundër Shqipërisë!

Edi Rama sapo ngriti kartonat në Kuvend për të krijuar imunitet ekstra para drejtësisë dhe për të mbrojtur korrupsionin, duke shënuar një rekord të shëmtuar e historik.
Rrëzimi i kërkesës së SPAK për arrestimin e Belinda Ballukut, e pandehur me akuzën e shpërdorimit të 1.1 miliardë eurove, është kufiri që Edi Rama i vendos drejtësisë.

Eshtë e qartë se aferat për të cilat hetohet Balluku, janë afera të Edi Ramës, ku ai është totalisht i përfshirë. Ndaj, mbrojtja e saj u bë për Kryeministrin e shumicën, më e rëndësishme se integrimi i vendit, se raportet me Brukselin, se barazia para ligjit, se lufta ndaj korrupsionit.

Me votimin e turpshëm sot që do të mbahet mend gjatë dhe do të ngelet si vepër e Edi Ramës dhe e të gjithë atyre deputetëve që ngritën kartonin pro-korrupsionit e kundër drejtësisë, u shkel haptazi vija e kuqe.

Shqipëria nuk e kaloi testin kritik.

Edi Rama u tregoi qytetarëve dhe partnerëve ndërkombëtarë, me votë, me vendim Parlamenti, se ai ngriti sot sulltanatin e tij privat.
Ky regjim hajdutërie i themeluar sot në Kuvend, nuk do ta ketë jetën të gjatë sepse është ngritur kundër vlerave, parimeve e aspiratave të shumicës së shqiptarëve.

Shqiptarët nuk meritojnë të kenë një Republikë të Korrupsionit, ku abuzimi me fondet publike dhe paratë e shqiptarëve mbrohet me votë.
Vendi ynë sot është pranë një gremisje të rrezikshme. Por, në honin e zullumit të tij do të bjerë Edi Rama.

Bashkë me qytetarët, nuk do lejojmë që ai të marrë me vete dhe Shqipërinë.