PD kërkon interpelancë urgjente për krizën energjetike!

Grupi Parlamentar i Partisë Demokratike ka depozituar një kërkesë për interpelancë urgjente në Kuvend me Ministrin e Energjisë, duke ngritur shqetësime serioze për përgatitjen e vendit për një krizë të mundshme energjetike dhe garantimin e furnizimit me karburant.

Në kërkesën drejtuar Kuvendi i Shqipërisë, deputetët e opozitës theksojnë se zhvillimet ndërkombëtare, të nxitura nga konflikti në Iran, kanë sjellë rritje të menjëhershme të çmimeve të energjisë dhe të produkteve të naftës, duke rritur rrezikun për tregun vendas.

Sipas opozitës, alarmet janë dhënë edhe nga institucione ndërkombëtare si Agjencia Ndërkombëtare e Energjisë, e cila ka udhëzuar vendet e Bashkimit Europian të përgatiten për përdorimin e rezervave të sigurisë, si dhe nga Komisioneri Europian për Energjinë, Dan Jørgensen, që ka paralajmëruar për ndërprerje të mundshme të furnizimit.

DEKLARATA

I nderuar z. Kryetar i Kuvendit, Nisur nga situata ndërkombëtare e shkaktuar nga lufta në Iran, situatë e cila ka ndikuar në rritjen e shpejtë të cmimeve të energjisë, vecanërisht të naftës dhe derivateve të saj; Nisur nga fakti që Agjencia Ndërkombëtare e Energjisë (IEA) ka udhëzuar vendet e BE-së për përgatitjen për lëshimin në treg të naftës nga Rezervat e Sigurisë;

Nisur nga fakti se Komisioneri për Energjinë Zt. Dan Jorgensen, u ka kërkuar vendeve anëtare të Bashkimit Evropian të përgatiten për ndërprerje të mundshme në furnizimin me energji, përmes një letre drejtuar ministrave të energjisë.

Nisur nga fakti që Kryeministri ka folur për një model të ri për mbajtjen e Rezervës energjetike të sigurisë si dhe për themelimin e nje kompanie shtetërore që do të hyjë në tregun e tregtimit të naftës dhe derivative të saj; Nisur nga fakti që situate ndryshon me shumë shpejtësi dhe kemi hyrë në një emergjencë të vërtetë të përballjes me këtë krizë;

Për sa më sipër, Shqipërisë i dalin përpra detyra të mëdha për përgatitjen për një krizë energjetike e cila do të kërkonte angazhim të madh shtetëror, e vecanërisht masa konkrete të Ministrisë së Energjetikës për cështje të garantimit të furnizimit me karburant, të menaxhimit të duhur të Rezervës së Sigurisë dhe të koordinimit institucional me BE dhe IEA.

Prandaj, duke pasur parasysh sa më sipër, në cilësinë e deputetit të Kuvendit të Shqipërisë, bazuar në nenin 80, pika 1 të Kushtetutës dhe nenin 96, pikat 1 dhe 2 të Rregullores së Kuvendit, kërkoj zhvillimin e një interpelance urgjente me Ministrin Energjetikës dhe Transportit, për të dhënë shpjegime dhe informacione lidhur me sa më lart.

Duke ju falënderuar për bashkëpunimin.

Deputeti: Eno Bozdo