Afera “Rama-Alabar”/ 42 milionë euro të arkëtura për pallatet që po fundoesen në Durrës

Sipas të dhënave të fundit nga bilanci i vitit 2024, kompania zhvilluese “Durrës Marina sha” ka arritur të arkëtojë rreth 42 milionë euro (4.17 miliardë lekë) ekskluzivisht nga parapagimet e klientëve.

Ky volum mjetesh monetare, i cili është dyfishuar në krahasim me vitin e kaluar, konfirmon se motori kryesor i financimit për tre godinat e para A01, A02 dhe A04 nuk janë kapitalet e huaja, por paratë e mbledhura nga shitjet e apartamenteve që ende nuk kanë përfunduar, ose siç njihet ndryshe, shitjet “në ajër”.

Financimi: Klientët në rolin e bankierit

Në raportin e saj të aktivitetit, vetë kompania pranon se këto parapagime përbëjnë një “komponent të rëndësishëm të financimit”. Përderisa kostot e ndërtimit për vitin 2024 raportohen rreth 35 milionë euro, shifra prej 42 milionë eurosh e mbledhur nga blerësit tregon se investitori po operon me një rrezik financiar pothuajse zero, duke mbuluar çdo shpenzim direkt nga xhepat e qytetarëve.

Kjo skemë mbështetet në kontrata agresive, ku blerësit detyrohen të paguajnë 20% të vlerës menjëherë pas firmosjes dhe 20% të tjerë brenda muajve të parë nga marrja e lejes së ndërtimit, duke i siguruar kompanisë likuiditet të plotë përpara se të hidhet tulla e parë.

Favorizimet shtetërore dhe rritja e çmimeve

Ajo që e bën këtë situatë edhe më komplekse është fakti se ky projekt po zhvillohet mbi 818 mijë m² tokë shtetërore, e cila i është kaluar investitorit falas nga qeveria shqiptare. Përveç truallit, kompania është përjashtuar nga taksa e ndikimit në infrastrukturë dhe fondi i strehimit social, lehtësi këto që llogariten në rreth 7% të vlerës së parashikuar të shitjeve.

Pavarësisht këtyre dhuratave nga taksapaguesit shqiptarë, çmimet e apartamenteve kanë pësuar një rritje galopante; nga 1,500-1,600 euro/m² që nisën në fillim, sot ato kanë kapërcyer kufirin e 3,000 eurove/m², duke u bërë të papërballueshme për pjesën dërrmuese të popullsisë.