Gazeta RD
Fjala e Jonathan Pano
Të nderuar demokratë, të nderuar delegatë të Kuvendit Kombëtar, miq e bashkëluftëtarë në këtë betejë, i nderuar profesor Berisha,
Jam i bindur se sot nuk jemi mbledhur vetëm për një proces të brendshëm partie. Nuk jemi këtu vetëm për emra, struktura apo procedura. Sot jemi për të folur për drejtimin që duhet të marrë Partia Demokratike dhe, më shumë se kaq, për drejtimin që duhet të marrë Shqipëria.
Shqipëria sot nuk ka nevojë vetëm për një opozitë më të zhurmshme, por për një opozitë të ripërtërirë, më të vendosur dhe më të rrënjosur në vlera. Ne nuk mund të jemi thjesht kundër një qeverie, por duhet të jemi pro një vizioni: pro familjes, pro lirisë, pro pronës, pro meritës, pro besimit, pro kombit dhe, mbi të gjitha, pro Shqipërisë.
Unë besoj se Partia Demokratike duhet të kthehet me guxim tek identiteti i saj natyral, tek vlerat konservatore që e kanë mbajtur këtë vend në këmbë edhe në kohët më të vështira: tek besimi tek Zoti, tek familja dhe tek kombi. Këto nuk janë slogane të vjetra, por themelet mbi të cilat ndërtohet një shoqëri e shëndetshme.
Sepse kur humbet besimi, dobësohet morali publik. Kur sulmohet familja, dobësohet shoqëria. Kur dobësohet kombi, largohet rinia. Dhe kur largohet rinia, Shqipëria nuk humbet vetëm popullsinë, por edhe të ardhmen e saj.
Shpesh flasim për shpopullimin. Ai nuk është thjesht statistikë e INSTAT apo Eurostat, por realitet i përditshëm. Vetëm në vitin 2024, mbi 100 mijë shqiptarë janë larguar nga vendi. Kjo do të thotë se çdo disa minuta, një qytetar largohet. Shpopullimi është karrigia bosh në tryezën e familjes, lagjja pa fëmijë, shkolla që mbyllen dhe prindër që mbeten vetëm.
I riu nuk largohet sepse nuk e do Shqipërinë, por sepse nuk sheh më mundësi këtu. Dhe këtu nis beteja jonë.
Ne duhet t’u themi shqiptarëve qartë: Partia Demokratike nuk do të ndryshojë vetëm qeverinë, por do të ofrojë një alternativë që rikthen shpresën për jetën këtu. Që një i ri të punojë këtu, një familje të rrisë fëmijët këtu, një sipërmarrës të zhvillojë biznesin e tij pa pengesa, dhe një student të mos e shohë emigrimin si të vetmen rrugë.
Në Këshillin Bashkiak të Tiranës kam parë nga afër pasojat e keqqeverisjes: rritje taksash, mungesë transparence, dhe vendimmarrje të larguar nga qytetarët. Kjo na tregon se politika duhet të fillojë nga njeriu, nga familja dhe nga qytetari i zakonshëm.
Partia Demokratike duhet të jetë shtëpia e njerëzve të lirë: e atyre që besojnë tek prona, tek tregu i lirë, tek shteti i kufizuar, tek familja e fortë, tek arsimi cilësor dhe tek meritokracia. Ne fitojmë kur jemi vetvetja dhe kur mbrojmë parimet tona edhe në kohë të vështira.
Familja është institucioni i parë i shoqërisë. Prindi duhet të mbështetet, fëmija të mbrohet, liria të garantohet dhe kombi të respektohet. Kjo nuk përjashton askënd, por ndërton një shoqëri me rrënjë dhe dinjitet.
Të nderuar demokratë,
Kjo betejë nuk fitohet me zemërim, por me organizim, ide dhe karakter. Me njerëz që hyjnë në politikë për të shërbyer, jo për t’u pasuruar. Ne duhet të jemi të pranishëm në çdo hapësirë shoqërore: në forume, bashki, universitete, media dhe komunitete.
Ne duhet të ndërtojmë një rrjet të gjerë demokratësh të rinj në çdo gjimnaz, universitet dhe komunitet, për të rikthyer besimin dhe angazhimin qytetar.
Ne nuk premtojmë iluzione, por një shtet më të ndershëm, një ekonomi më të lirë, një familje më të mbrojtur dhe një Shqipëri më dinjitoze.
Misioni ynë nuk ka mbaruar. Ai sapo është ripërtërirë. Të kthehemi tek rrënjët tona, tek vlerat tona dhe tek Shqipëria reale.
Nëse kemi guximin ta bëjmë këtë, Partia Demokratike nuk do të jetë thjesht alternativë politike, por shpresa e domosdoshme për këtë vend.
Zoti e bekoftë Partinë Demokratike, Zoti i bekoftë shqiptarët kudo që janë.
