Gazeta RD
Deputetja e Partisë Demokratike, Ina Zhupa, ka reaguar përmes një videoje dhe një postimi në rrjetet sociale, duke sjellë në vëmendje vendimin e Gjykatës Kushtetuese të vitit 2025, e cila rrëzoi kërkesën e saj për shfuqizimin e ligjit 21/2024 për Zonat e Mbrojtura.
Zhupa shprehet se, kur institucioni kishte mundësinë dhe përgjegjësinë për të ndalur ligjin, nuk u ngrit në lartësinë e detyrës, duke theksuar se kjo vendimmarrje ka tronditur besimin e qytetarëve.
Sipas saj, protestat e qytetarëve janë një tregues i qartë i pakënaqësisë ndaj sistemit, pasi edhe institucionet e pavarura, sipas saj, nuk funksionojnë si të tilla.
“Në këtë betejë të qytetarëve për mbrojtjen e interesit publik nuk duhet të harrojmë rolin e Gjykatës Kushtetuese…”, shprehet Zhupa, duke theksuar se vendimmarrja 4 me 4 la ligjin në fuqi dhe qytetarët pa përgjigje.
Ajo shton se perceptimi për mungesë pavarësie të institucioneve është rritur, duke përmendur edhe rastin e Holta Zaçajt, për të cilën thotë se ngritja e saj në poste të rëndësishme ngre pikëpyetje për standardet institucionale.
Në fund, Zhupa i bën thirrje Gjykatës Kushtetuese të reflektojë, duke theksuar se çdo vendim gjykohet nga historia dhe se institucionet duhet të veprojnë pa ndikime politike.
