Gazeta RD
Rama ka reaguar ashpër ndaj protestave që po zhvillohen në Tiranë prej 22 ditësh, duke akuzuar organizatorët dhe pjesëmarrësit se po shpenzojnë, sipas tij, burime financiare për të dëmtuar imazhin e Shqipërisë dhe të shqiptarëve në rajon.
Ai ka pranuar se kjo është një lëvizje kombëtare për ta rrëzuar atë nga pushteti duke deklaruar se me protestuesit janë bashkuar edhe protestues nga Kosova dhe Maqedonia e Veriut.
Reagimi i tij erdhi pas një komenti të një qytetareje nga Tetova, e cila në rrjetet sociale i shkruante: “Shqiptari i Tetovës, azgan i madh në Tiranë: ‘Kryeministër, jep dorëheqje, na lër të qetë!’ Kush është kryeministri i tij? A mundet, a e merr mendja, a guxon t’ia thotë këtë kryeministrit të vet?
Breshka, kërmilli dhe poltroni u bënë zotërinj, por mos na e merrni fytyrën kudo që shkoni, o pelikanë!”
Në një deklaratë të gjatë, Rama komentoi pjesëmarrjen e grupeve nga Kosova dhe Maqedonia e Veriut në protestat në kryeqytet duke pretenduar se janë financuar dhe përdoren për të krijuar tension politik si edhe për të dëmtuar imazhin ndërkombëtar të shqiptarëve.
“Po harxhojnë shumë para vetëm e vetëm për t’i bërë dëm kombëtar e ndërkombëtar imazhit të shqiptarëve të Maqedonisë së Veriut dhe vetë Kosovës,” është shprehur Rama.
Në reagimin e tij, kryeministri ka komentuar edhe aktorë politikë nga Kosova, duke lënë të kuptohet se Lëvizja Vetvendosje është përfshire tek ajo që e quan “çorbë dreqërish” në skenën politike.
Postimi i plotë:
Nuk e njoh zonjën, po më çoi dikush këtë postim që më nxiti shënimin më poshtë:
Shqiptarët e Maqedonisë së Veriut nuk janë diasporë e Shqipërisë në tokë të huaj, së bashku me maqedonasit e veriut ata janë popull shtetformues në tokën e tyre në shtetin fqinj!
Diasporë janë mërgimtarët në vende të huaja, jo ata dhe as shqiptarët e Kosovës jo e jo, të cilët kanë shtetin e tyre të pavarur.
Kur ushtarët e verbër të karvaneve politike nga Prishtina e Tetova paraqiten në Tiranë si “diasporë”,, me flamuj kombëtarë që bëhen dekor i një farse të tillë dhe me plisa të bardhë që nxihen prej një marreje si kjo, ata janë thjesht viktima të zellshme që nuk ia bëjnë dot vetes një pyetje të thjeshtë:
Brengoset apo gëzohet kush i do shqiptarët në sherr e në rrëmujë, kur e sheh këtë “diasporë” të Maqedonisë së Veriut dhe Kosovës të turret si një hordhi pushtuese mbi kuaj me katër rrota drejt Tiranës, për të rrëzuar qeverinë e Shqipërisë?
Kjo është një pyetje që në fakt duhet t’ia bëjnë vetes sponsorët e tyre, të cilët i siguroj se po i harxhojnë paratë vetëm e vetëm për t’i bërë dëm kombëtar e ndërkombëtar imazhit të shqiptarëve të Maqedonisë së Veriut dhe vetë Kosovës. Sepse sa për mua dhe qeverinë e Partisë Socialiste duhet të vazhdojnë të paguajnë naftë, ushqim e qeleshe, deri ditën kur mbaron kontrata jonë e pazgjidhshme me 856.177 shqiptarë e shqiptare, brenda e jashtë atdheut. Maj 2029.
Dhe nuk do të më hiqet kurrë nga mendja përdhosja e flamurit çlirimtar të UÇK-së, duke u ngritur si bajrak urrejtjeje për rrëzimin e qeverisë në Tiranë! Çfarë dhurate për ata që nuk e njohin Kosovën dhe për ata që gjithnjë na kanë përqeshur si një popull pa aftësi shtetbërëse. Bash përdhosës e baltosës kësisoj ia kanë sjellë në majë të pendës edhe Atit të Shqiptarisë, Gjergj Fishtës:
“Ju rrugaça e sallahana,
vagabonda shakllabana,
rriqna t’ndyet, mikrobe t’kqij,
qi të mjerës moj Shqipni
kthelltë hi i keni n’mushkni…”
Post Scriptum. Dhe mos të spekullojë askush duke e lidhur këtë shënim me emrin e kryeministrit të Kosovës, sepse kurrësesi nuk mund ta bëj e as ta nënkuptoj në asnjë rrethanë përgjegjës, për asnjë prej sallahanave të Vetëvendosjes që janë përfshirë në këtë çorbë dreqërish. Nuk e them këtë hiçasfare për një larje protokollare goje, por sepse e di mirë që çdo çadër e gjerë politike mban edhe sallahanat e vet dhe do të fyeja inteligjencën e Albinit po të mendoja se ai gjykon si ata. Kështu që lëreni Albin Kurtin jashtë kësaj çorbe të neveritshme.
