Shteti le paratë e pensionistëve në kazino/ 27 herë brenda muajit

Gjatë seancës gjyqësore të zhvilluar për caktimin e masave të sigurisë, Prokuroria ka paraqitur detaje tronditëse nga hetimi disamujor, duke zbardhur skedën e plotë të frekuentimit të ambienteve të lojërave të fatit nga Mataj dhe bashkëshorti i saj.

Sipas të dhënave zyrtare të sistemit të monitorimit të siguruara nga organi i akuzës, ish-drejtoresha rezulton të ketë një historik prej plot 335 hyrjesh në kazino, duke u cilësuar si një frekuentuese e rregullt e një prej këtyre ambienteve të njohura si “Plaza”.

Për të treguar intensitetin e lartë të këtij aktiviteti, hetuesit specifikuan se vetëm përgjatë muajit maj, ajo ka regjistruar 27 hyrje në këtë ambient, shifër kjo që bëhet edhe më e rëndë kur përfshihet edhe bashkëshorti i saj, i cili nga verifikimet rezulton me 340 hyrje në kazino.

Prokuroria ka referuar gjithashtu dyshime të forta mbi shumat e mëdha të parave që dyshohet se janë luajtur në dy kazino të ndryshme në Tiranë, të cilat tashmë janë pjesë e verifikimeve të thelluara financiare në kuadër të këtij hetimi për të zbuluar nëse janë përdorur paratë e pensioneve.

Përballë këtyre pretendimeve të ngritura në sallën e gjyqit, Elisabeta Mataj nuk e ka mohuar faktin që i ka frekuentuar këto ambiente lojërave të fatit, por ka kundërshtuar me forcë çdo lidhje të mundshme të jetës së saj private me shkeljet ligjore apo me pozicionin e saj zyrtar. Ajo është mbrojtur përpara trupit gjykues duke argumentuar se është një qytetare e lirë dhe ka kërkuar t’i shpjegohet se cila kontratë e firmosur apo cilat nene të ligjit ia ndalojnë asaj që të shkojë lirisht në lokale, bare apo kazino.

Në përfundim të shqyrtimit të të gjitha provave të grumbulluara dhe argumenteve të palëve, Gjykata e Durrësit vendosi të pranojë pjesërisht kërkesën e paraqitur nga Prokuroria, duke e vlerësuar si plotësisht të ligjshëm ndalimin e të tria shtetaseve të përfshira në këtë çështje. Përpos caktimit të masave të arrestit në burg për ish-drejtoreshën Mataj dhe arrestit në shtëpi për dy punonjëset e tjera, gjykata ka lënë një afat ligjor prej 5 ditësh për lejimin e ankimimit të këtij vendimi në Gjykatën e Apelit të Juridiksionit të Përgjithshëm në Tiranë.