100 bashki dhe 6 rajone për qytetarët, jo për pushtetarët!

Janë as më shumë e as më pak por:

“100 bashki dhe 6 rajone për qytetarët, jo për pushtetarët”

Kjo është një alternativë me 39 bashki më shumë nga harta e dështuar aktuale me 61 bashki, si dhe 54 bashki më shumë nga oferta e re edhe më e rezikshme e PS!

Projekti ynë me 110 bashki është një tentativë për të sjellë sa të jetë e mundur bashkinë pranë qytetarëve

Ai nuk përkon në fakt me ëndrrën e vjetër të Edi Ramës për të qenë njëkohësisht Kryeministër dhe Kryebashkiaku i Shqipërisë!

Ndaj kjo ambicje anormale e tij për oushtet të pakufizuar, megjithë kamuflimin pas efiçencës e përralla të tjera ka shkaktuar alarm, protesta të shumta, mos dakortësi dhe zemërim të ligjshëm në gjithë Shqipërinë!

Në këto rrethana, të ndjerë të braktisur dhe zhgënjyer nga harta Rama me 46 bashki, qytetarët sigurisht që kërkojnë të dinë më shumë për Hartën e Re që ofron opozita!

Për këtë shkak, në interes të opinionit publik, në veçanti të 15 bashkive që shkrihen, po ju paraqes:

Tabelën e Plotë të Ndarjes së Bashkive dhe Njësive Administrattive, si dhe dy fjalë për projektin e Opozitës, i cili synon të mbështesë bashkitë të vetqeverisen dhe jo të qeverisen nga Kryeministria!

Projekti i opozitës, si produkt i një ekipi ekspertësh të nivelit të lartë, përfaqëson në fakt një strukturë të decentralizuar dhe me përmbajtje tërësisht të re për Reformën Administrativo-Territoriale 2026,

Ai është ndërtuar mbi analizën e pasojave rënuese të reformës së vitit 2014, me kritere në kundërshtim me kalkulimet paranojake të Ramës për të fituar zgjedhjet e ardhshme elektorale në kurriz të shkrirjes së 15 bashkive.

Projekti opozitës bazohet në kritere e standardet evropiane të performancës së bashkive, të analizës GIS të territorit, garancitë të vetëqeverisjes vendore dhe në nevojat reale të qytetarëve dhe jo pushtetarëve.

Projekti propozon një model të ri të organizimit territorial me dy nivele të qeverisjes vendore:

100 bashki dhe 6 rajone, duke synuar një pushtet vendor më funksional, më demokratik, më efikas dhe më pranë qytetarëve, që do të thotë më larg pushtetarëve.

Objektivi është i qartë:

“Një hartë e re dhe organizim territorial që garanton më mirë funksionalitetin, autonominë vendore, subsidiaritetin, përfaqësimin demokratik dhe aksesin e qytetarëve në shërbime publike cilësore.”

Modeli i ri nuk kufizohet vetëm në ndryshimin e hartës territoriale.

Oferta e opozitës është një reformë e plotë e qeverisjes vendore

Ai parashikon:

• organizim të ri territorial me 100 bashki;

• krijimin e 6 rajoneve si niveli i dytë i qeverisjes vendore;

• decentralizim real të kompetencave dhe burimeve financiare;

• forcimin e autonomisë fiskale të bashkive;

• rritjen e rolit të komuniteteve në vendimmarrje;

• zhvillim më të balancuar ekonomik dhe territorial.

Pse nevojiten më shumë bashki?

Partia Demokratike beson se rritja e numrit të bashkive nuk është një qëllim në vetvete, por një instrument për të forcuar demokracinë vendore e afërsinë me qytetarin, si dhe për të përmirësuar cilësinë e qeverisjes dhe shërbimeve për qytetarët.

Modeli i ri synon:

• të jetë funksional dhe i aksesueshëm për qytetarët

• të afrojë vendimmarrjen me qytetarët;

• të rrisë llogaridhënien e institucioneve vendore;

• të forcojë identitetin historik dhe komunitar të territoreve;

• të përmirësojë aksesin në shërbimet publike;

• të krijojë kushte më të mira për zhvillimin ekonomik lokal;

• të frenojë shpopullimin dhe boshatisjen e zonave rurale;

• të sigurojë një zhvillim më të balancuar territorial.

Bashkitë aktuale administrojnë banorë e territore shumë të mëdha ( 7-8 herë më shumë se norma evropiane), të centralizuar, por me buxhete të vegjël që nuk prekin 1/3 e teeritorit të vendi! Çka e bën më të vështirë ofrimin e shërbimeve, planifikimin territorial dhe përfaqësimin efektiv të komuniteteve.

Bashkitë që propozon opozita janë më funksionale dhe më pranë qytetarëve krijojnë administrim më të mirë, reagim më të shpejtë ndaj nevojave lokale dhe shpërndarje më të drejtë të investimeve.

Opozita paraqet një reformë që mbështetet në kritere, deduksione shkencore dhe fakte!

Analiza mbi të cilën është ndërtuar projekti evidenton se pas reformës së vitit 2014 Shqipëria ka përjetuar një rënie të ndjeshme të popullsisë, me rreth 420 mijë banorë më pak sipas Censit 2023, ndërsa shumë qarqe kanë humbur një pjesë të konsiderueshme të popullsisë së tyre.

Në të njëjtën kohë, distancat administrative janë rritur, investimet janë përqendruar kryesisht në qytetet qendër dhe mbi 70% e bashkive vazhdojnë të varen nga transfertat e qeverisë qendrore.

Këto të dhëna tregojnë se madhësia e bashkisë nuk garanton automatikisht eficiencë, autonomi financiare apo shërbime më të mira.

Modeli i opozitës është gjithashtu në përputhje me standardet evropiane

Projekti mbështetet në parimet e Kartës Evropiane të Vetëqeverisjes Vendore, sipas së cilës vendimmarrja duhet të ushtrohet sa më afër qytetarit.

Përvoja evropiane tregon se nuk ekziston një model unik organizimi territorial; shtetet demokratike kërkojnë një ekuilibër ndërmjet eficiencës administrative, autonomisë vendore, përfaqësimit demokratik dhe zhvillimit lokal. Pikërisht këtë balancë synon të arrijë edhe modeli i propozuar nga Partia Demokratike.

Partia Demokratike është e bindur se debati nuk duhet të përqendrohet tek pyetja :

“sa bashki duhet të ketë Shqipëria”,

por tek pyetja shumë më e rëndësishme:

” Sa bashki dhe cili model i qeverisjes vendore garanton më mirë shërbimet, përfaqësimin demokratik, autonominë vendore dhe zhvillimin e qëndrueshëm të territorit?”

Ky është vizioni që udhëheq PD në hartimin e Reformës Administrativo-Territoriale 2026.