Shkodra nën pushtetin e armëve, qeveria jep shfaqje

Nga Luçiano BOÇI

Vetëm tri ditë pasi një qytetar u plagos me armë zjarri në mes të ditës, në lagjen “Partizani”, sot Dukagjini u përgjak nga vrasja e babë e bir dhe plagosja e rëndë e një qytetari tjetër.
Nga qendra e Shkodrës deri në Pult, armët po flasin më shpesh se ligji.
Këto nuk janë më episode të shkëputura. Janë kambana alarmi për degradimin e rendit dhe braktisjen e sigurisë publike.
Policia shfaqet pasi krisin armët. Qeveria shfaqet më pas me njoftimin standard se “po punohet për zbardhjen e ngjarjes”.
Por ku është shteti përpara se të merren jetë?
Sa armë qarkullojnë lirshëm?
Sa konflikte lihen të fermentojnë derisa përfundojnë në gjak?
Terreni i vështirë nuk mund të jetë alibi për mungesën e shtetit. Dukagjini është Shqipëri dhe Shkodra nuk mund të trajtohet si një territor i harruar, ku krimi përcakton vetë orën dhe vendin e goditjes.
Lamallari dhe drejtuesit e Policisë së Shtetit duhet t’u japin menjëherë përgjigje shkodranëve, jo me bilance propagandistike, por me masa konkrete sigurie.
Qeveria e Ramës është e fortë me qytetarët dhe kundërshtarët politikë, por e pafuqishme përballë armëve dhe krimit.
Kur arma flet më fort se shteti, rendi ka rënë. Dhe përgjegjësia është vetëm politike!