Trump: SHBA do të ndërpresë financimin prej 4 miliardë dollarësh për Izraelin

Presidenti amerikan Donald Trump deklaroi të martën se ka arritur një marrëveshje me kryeministrin izraelit Benjamin Netanyahu, sipas së cilës Uashingtoni do të ndërpresë financimin prej 4 miliardë dollarësh për Izraelin pas përfundimit të këtij viti.

Duke folur në emisionin “Fox and Friends” të rrjetit Fox News, Trump tha se Izraeli nuk ka më nevojë për këtë financim dhe se disa demokratë e politikanë të krahut të majtë po e përdorin mbështetjen financiare të SHBA-së për Izraelin si argument për të kritikuar republikanët, shkruajnë mediat e huaja, përcjell Telegrafi.

“Tani, sa i përket pagesave për Izraelin, unë dhe Bibi Netanyahu kemi rënë dakord – ne i japim Izraelit 4 miliardë dollarë në vit – dhe kemi rënë dakord muaj më parë që do ta ndërpresim këtë”, tha Trump për emisionin “Fox and Friends” të Fox News.

“Ne tashmë kemi rënë dakord që, deri në fund të këtij viti, nuk do t’i bëjmë më pagesa Izraelit. Sigurisht, ne do ta ndihmojmë Izraelin nëse ata kanë nevojë”, shtoi ai.

Sipas mediave të huaja, nuk pati ndonjë reagim të menjëhershëm nga zyra e Netanyahut lidhur me deklaratat e Trumpit dhe as nuk ishte menjëherë e qartë se për cilin financim specifik e kishte fjalën Trump.

Një memorandum mirëkuptimi, i cili parashikon 3.8 miliardë dollarë ndihmë ushtarake vjetore nga SHBA-ja për Izraelin, pritet të skadojë në vitin 2028; ndërkohë, kanë nisur diskutimet se si do të evoluojë ndihma e Uashingtonit për Izraelin pas kësaj date.

“Ata mund të blejnë çfarë të duan. Mund të blejnë çfarë të duan. E njëjta gjë vlen edhe për Evropën. Ne prodhojmë armët më të mira në botë”, shtoi Trump të martën.

Në një intervistë për CBS në muajin maj, Netanyahu shprehu shpresën se Izraeli do të mund ta shkëpuste varësinë nga mbështetja ushtarake amerikane brenda një dekade.

Në një letër dërguar një kongresmeni amerikan në qershor, ai shkroi se kishte ardhur koha që Izraeli “të kalojë nga statusi i përfituesit të ndihmës në atë të partnerit”.

Mbështetja publike në SHBA për Izraelin ka rënë që nga fillimi i luftës në Gaza në vitin 2023, veçanërisht në mesin e demokratëve.