Gazeta RD
Nga Ilda ZHULALI
IBAR të pyet sot zoti kryeministër:
Cili vend anëtar i BE-së nuk siguron kushte të barabarta në zgjedhje? Cili vend anëtar e ka partinë dhe shtetin të bërë njësh, duke përdorur burimet shtetërore dhe levat institucionale për të devijuar votën e qytetarëve? Cili vend anëtar i BE-së mban të gjallë rrjetet e patronazhit që u qëndrojnë si cekan mbi kokë votuesve?
Cili vend anëtar i BE-së ka një parlament ku mbikëqyrja e ekzekutivit është e kufizuar deri në inekzistencë? Cili vend anëtar i BE-së nuk lejon komisionet hetimore të funksionojnë lirshëm për të kontrolluar qeverinë? Cili vend anëtar i BE-së i kalon ndryshimet buxhetore me akte normative, duke anashkaluar Parlamentin dhe duke i grabitur të drejtat buxhetore? Cili vend anëtar i BE-së miraton ligje pa konsultime thelbësore dhe pa kohë të mjaftueshme për debat gjithëpërfshirës?
Cili vend anëtar i BE-së e ka korrupsionin të përhapur në të gjitha degët e qeverisjes qendrore dhe vendore? Cili vend anëtar i BE-së ka infrastrukturën publike, kadastrën, doganat, tatimet, shëndetësinë, arsimin, prokurimet publike dhe PPP-të si sektorët më të kalbur nga korrupsioni? Cili vend anëtar i BE-së ka një parlament që mbron me imunitet zëvendëskryeministren e kapur në korrupsion? Cili vend anëtar i BE-së kërcënon me amnisti për të shpëtuar të korruptuarit nga drejtësia?
Cili vend anëtar i BE-së ka zyrtarë publikë që ushtrojnë ndikim të padrejtë mbi institucionet e drejtësisë, përfshirë SPAK-un? Cili vend anëtar i BE-së refuzon të zbatojë vendimet e Gjykatës Kushtetuese ndaj ministres së jashtme? Cili vend anëtar i BE-së nuk zbaton standardet e Komisionit të Venecias për heqjen e imunitetit të deputetëve? Cili vend anëtar i BE-së ka 75% të vendeve gjyqësore vakante dhe nuk arrin të plotësojë gjykatat e prokuroritë?
Cili vend anëtar i BE-së e ka policinë shumë të prekshme ndaj korrupsionit, ku integriteti mbetet emergjencë? Cili vend anëtar i BE-së bën emërime, transferime dhe promovime në polici jo mbi bazë merite, por mbi baza partiake? Cili vend anëtar i BE-së ka numër të lartë ndryshimesh në emërime që minojnë profesionalizmin e policisë? Cili vend anëtar i BE-së nuk lejon Agjencinë e Mbikëqyrjes së Policisë të hetojë plotësisht dhe pa pengesa shkeljet brenda uniformave blu?
Cili vend anëtar i BE-së ka pasur nevojë të pezullojë amnistinë fiskale që të dalë nga lista e zezë e FATF-it? Cili vend anëtar i BE-së paralajmërohet se amnistitë e mundshme dhe programet e pajtueshmërisë vullnetare tatimore duhet të jenë në përputhje me standardet ndërkombëtare, sepse rrezikojnë të pastrojnë paratë e krimit? Cili vend anëtar i BE-së nuk ka një histori të besueshme të hetimeve sistematike financiare për krimin e rëndë dhe pastrimin e parave? Cili vend anëtar i BE-së nuk arrin të krijojë një historik solid në sekuestrimin dhe konfiskimin përfundimtar të aseteve të krimit?
Cili vend anëtar i BE-së është vend origjine, tranziti dhe destinacioni i trafikimit të qenieve njerëzore? Cili vend anëtar i BE-së paralajmërohet se duhet të zbatojë masa mbrojtëse për të parandaluar devijimin e produkteve gjatë kultivimit të ligjshëm të kanabisit? Cili vend anëtar i BE-së nuk ka histori solide hetimesh, ndjekjesh penale dhe dënimesh përfundimtare për krimin e rëndë dhe të organizuar? Cili vend anëtar i BE-së nuk arrin të sekuestrojë dhe shkatërrojë drogat dhe të konfiskojë asetet përkatëse?
Cili vend anëtar i BE-së nuk i lëshon qytetarëve tituj të qartë dhe të sigurt prone, duke shtyrë regjistrimin e parë deri në 2028 dhe sistemin e plotë deri në 2030? Cili vend anëtar i BE-së nuk publikon hartat kadastrale, duke mbajtur të fshehur procesin e dixhitalizimit? Cili vend anëtar i BE-së ka një Agjenci Shtetërore të Kadastrës që nuk respekton afatin 45-ditor për lëshimin e certifikatave të pronësisë? Cili vend anëtar i BE-së paralajmërohet për dokumente të falsifikuara në çështjet e pronës? Cili vend anëtar i BE-së bën shpronësime në emër të “interesit publik” pa kompensim të drejtë për pronarët legjitimë? Cili vend anëtar i BE-së ka ndikim disproporcional në zonat e minoriteteve kombëtare, në zonat me vlerë të lartë ekonomike dhe zonat bregdetare gjatë shpronësimeve? Cili vend anëtar i BE-së nuk zbaton vendimet gjyqësore përfundimtare për pronën, përfshirë vendimet e Gjykatës Europiane të të Drejtave të Njeriut?
Cili vend anëtar i BE-së vuan nga siguri e dobët ligjore, nivel i lartë informaliteti, vështirësi në zbatimin e kontratave dhe të drejtave të pronës? Cili vend anëtar i BE-së ka ndërmarrje shtetërore pa transparencë dhe llogaridhënie? Cili vend anëtar i BE-së paralajmërohet se duhet të rivendosë praktikën e ndryshimeve buxhetore nëpërmjet Parlamentit dhe të ndalojë aktet normative arbitrare? Cili vend anëtar i BE-së ka sektorët e pasurive të paluajtshme dhe ndërtimit të infektuar nga korrupsioni, tituj të paplotë prone dhe transaksione jo-financiare? Cili vend anëtar i BE-së duhet të përmirësojë menaxhimin e investimeve publike dhe prokurimin publik, përfshirë PPP-të e dyshimta? Cili vend anëtar i BE-së nuk ka Këshill Fiskal funksional për të garantuar besueshmërinë e shifrave buxhetore? Cili vend anëtar i BE-së e ka konkurrencën e penguar nga mungesa e njohurive sipërmarrëse, shpenzimet e ulëta për arsim dhe kërkim, dhe mbrojtja sociale e pamjaftueshme?
Këto janë plagët e themeleve të shtetit shqiptar të emërtuara një nga një në IBAR, që ju i keni krijuar, i keni thelluar dhe sot do t’i humbisni në përkthim!
