Pse Altini? Pse Entela?…

Po t’i lexonte kërkesat e protestuesve Altini, dikush do të thoshte: “Pse Altini?”

Po t’i lexonte Entela, do të dëgjohej: “Pse Entela?”

Po t’i lexonte Arbeni: “Pse Arbeni?”

Po t’i lexonte Etleva: “Pse Etleva?”

Po t’i lexonte Klajdi: “Pse Klajdi?”

Po t’i lexonte Sidorela: “Pse Sidorela?”

Po t’i lexonte Genti: “Pse Genti?”

“Pse Dritani dhe jo Erlisi?”

E kështu me radhë, derisa t’i trazoheshin eshtrat edhe Faik Beut atje, te Kodrat e Liqenit Artificial, ku prehet prej pak vitesh.

Por pyetja e vërtetë nuk është kush i lexon kërkesat.

Pyetja është shumë më e thjeshtë:

A jemi dakord me kërkesat e protestuesve, të artikuluara që në ditën e dytë dhe të tretë të protestës dhe të përsëritura edhe mbrëmë nga njëri prej qindra qytetarëve që kanë marrë mikrofonin gjatë këtyre njëzet e tre netëve?

Përgjigjja është:

PO, me të madhe!

Kërkesat janë të pandryshueshme, të qarta:

1-Dorëheqja e panegociueshme e Kryeministrit dhe e qeverisë.

2-Krijimi i një qeverie teknike tranzitore, jopartiake, me mandat 12-mujor.

3- Ndryshime kushtetuese që garantojnë barazinë e të gjithë qytetarëve para ligjit, të miratuara me referendum popullor, duke përfshirë ndryshimin e Kodit Zgjedhor, reformimin e financimit të partive politike dhe kufizimin e mandatit të Kryeministrit në jo më shumë se dy mandate gjatë gjithë jetës politike.

4-Shfuqizimin e ndryshimeve në ligjin për Zonat e Mbrojtura, ligjin për Trashëgiminë Kulturore, “Paketën e Maleve” dhe kuadrin ligjor për Investimet Strategjike.

5-Hartimin e një kontrate të re sociale mes qytetarëve dhe shtetit, në bashkëpunim me intelektualë, ekspertë dhe qytetarë apartiakë të propozuar nga vetë sheshi i protestës.

Këto janë kërkesat e shpallura publikisht.

Këto janë kërkesat që bashkojnë protestuesit.

Dhe këto janë kërkesa që nuk ndryshojnë në varësi të emrit të atij ose asaj që merr mikrofonin.

Le të mos harxhojmë energji duke pyetur “Pse e lexoi ky?” ose “Pse e lexoi ajo?”.

Le të përqendrohemi te ajo që ka vërtet rëndësi:

A jemi dakord me përmbajtjen?

Nëse përgjigjja është PO, dhe kështu është e vërteta, atëherë gjithçka tjetër është dytësore.

99.99% të protestuesve i bashkon dorëheqja e kësaj qeverie dhe krijimi i kushteve për një fillim të ri,

të një “Shqipërie të re”,

të një Shqipërie ndryshe,

të Shqipërisë që meritojnë shqiptarët dhe jo të asaj që ndërtuan për veten e tyre qeveritarët.

…dhe, siç do të thoshte Naim Bej: “Të mirat e tjera paskëtaj do të vijnë”.