Gazeta RD
Sipas reagimit të MABCO-s, prej prillit 2026 kompania nuk ka më akses në hapësirat dhe objektet e aeroportit të ndërtuara përmes investimeve të saj, duke i pamundësuar administrimin, mbrojtjen dhe shfrytëzimin e investimit. Kompania e lidh drejtpërdrejt këtë situatë edhe me bllokimin e punimeve në aeroport.
Pas dështimit të përpjekjeve për të gjetur një zgjidhje përmes rrugëve të tjera, MABCO i ka dërguar autoriteteve shqiptare një “Notice of Dispute”, duke iu referuar Marrëveshjes dypalëshe Zvicër-Shqipëri për nxitjen dhe mbrojtjen reciproke të investimeve.
Tashmë çështja ndodhet në periudhën gjashtëmujore të “cooling-off”, e cila u jep palëve mundësinë për të zgjidhur mosmarrëveshjen përmes dialogut dhe negociatave, përpara se çështja të dërgohet në arbitrazh ndërkombëtar, në ICSID, pranë Bankës Botërore në Uashington.
Në reagimin e saj, MABCO thotë se gjatë kësaj periudhe u ka bërë vazhdimisht thirrje autoriteteve shqiptare për dialog konstruktiv, por deri tani nuk ka marrë një përgjigje konkrete.
Kompania shprehet se do ta respektojë të gjithë periudhën e parashikuar nga kuadri ligjor, duke shpresuar që autoritetet shqiptare të angazhohen për zgjidhjen e konfliktit dhe shmangien e arbitrazhit.
Megjithatë, deklarata e MABCO-s ngre pikëpyetje të forta mbi mënyrën se si qeveria Rama po menaxhon një prej projekteve më të reklamuara të saj. Një investim i prezantuar si histori suksesi po përballet tashmë me bllokim punimesh, konflikt pronësie dhe kërcënimin e një përplasjeje në arbitrazh ndërkombëtar.
MABCO thekson se mbetet e gatshme për dialog dhe një zgjidhje të drejtë e të qëndrueshme, por shton se shmangia e përshkallëzimit të mëtejshëm të konfliktit varet nga gatishmëria e autoriteteve shqiptare për t’u angazhuar në mënyrë konstruktive.
Përplasja në arbitrazh do të thotë miliona euro nga xhepat e shqiptarëve, si në rastin e Beketit, për teka të Edi Ramës dhe shpurës së tij.
