Gazeta RD
Nga Sali BERISHA
23 vjet më parë, ish-kasapi i Ballkanit, Slobodan Millosheviçi ndërmori spastrimin etnik dhe genocidin e krimet më të egra kundër njerëzimit, ndaj shqiptarëve të Kosovës.
Hordhitë e tij barbare përzunë nga vatrat e tyre dhe nisën drejt Shqipërisë, rreth 1 milion shqiptarë.
Millosheviçi me operacionin e tij “Patkoi”, synonte të realizonte ëndrrën e tij të vjetër, spastrimin etnik të Kosovës, pra Kosovën pa shqiptarë.
Por me barbaritë e tij ai synonte edhe përhapjen jashtë kufijve të ish-Jugosllavisë – në Shqipëri, të katastrofës së madhe njerëzore që kishte shkaktuar në Kosovë.
Mirëpo projekti i tij dështoi. Shqiptarët, nga veriu në jug, nga lindja në perëndim, hapën zemrat dhe vatrat e tyre për vëllezërit të ndarë prej 50 vitesh, tashti në dhimbje, sakrifica dhe zi.
Vetëm Kukësi, Hasi dhe Tropoja strehuan rreth çerek milion vëllezër e motra nga Kosova dhe po kështu mbarë Shqipëria.
Shqiptarët, me mikpritjen dhe bujarinë e tyre, u dëshmuan samaritanë të vërtetë dhe bënë të dështoje projekti ogurzi i Beogradit për të krijuar një tragjedi tjetër njerëzore në Shqipëri.
Por kjo sagë vuajtje biblike e shqiptarëve të Kosovës pati dhe mrekullinë e saj: kthimin e tyre brenda një jave në vatrat e tyre, pas kapitullimit të Milosheviçit, si dëshmi e ngadhnjimit të tyre mbi barbaritë, vuajtjen, dhimbjen dhe genocidin.
Sot, pas 23 vitesh, Kosova është e lirë, e pavarur, faktor paqeje dhe stabiliteti në rajon. Por përsëri gjer sot Beogradi refuzon të njohë e të dënojë gjenocidin, krimet monstruoze të tij në Kosovë. Madje edhe sot, Presidenti i serbomadhisë, ish- Gebelsi i Millosheviçit gjatë luftës në Kosovë, Aleksandër Vuçiç, i thur himne Sadamit të Ballkanit dhe organizon provokacione e kërkon ndarjen, copëtimin e Kosovës.
Sot, pas 23 viteve, Edi Rama, duke shkelmuar mbi lumenjtë e gjakut, djersës, dhimbjeve dhe sakrificave të shqiptarëve të Kosovës, në plojën dhe kalvarin e mizorive të pushtuesit serb, është shndërruar në një vasal të padronit të tij Vuçiç, projektit të tij antishqiptar të serbomadhisë, “Ballkanit të Hapur”.
Ndaj sot le të shprehim ne nderimin tonë më të madh për sagën e dhimbshme të të gjithë atyre që 23 vite më parë u detyruan nën dhunë e terror të braktisin shtëpitë e tyre, por që u kthyen në ditët më të para të mundshme në vatrat e tyre dhe i rindërtuan ato nga shkrumbi dhe hiri. Një mirënjohje të veçantë të shprehim në këtë përvjetor për mikpritësit e tyre bujarë e fisnik në Shqipëri.
Së fundi, ju ftoj të dënojmë me forcë, qëndrimet e serbomadhit Vuçiç ndaj masakrave, genocidit dhe krimeve kundër njerëzimit të pushtuesve barbarë serbë në Kosovë dhe shërbimet që i bën atij Edi Rama, argati i Beogradit në Tiranë.
