Shembja e shtëpive, banorët protestë para zyrës së Veliajt: Do bëjmë rezistencë!

Një ditë përpara shembjeve që pritet të kryhen tek “5 maji”, banorët e kësaj zone kanë protestuar te bashkia e Tiranës. Teksa kanë kërkuar dëmshpërblime të drejta, ata janë shprehur se do të bëjnë rezistencë për të mbrojtur pronat.

Teksa vetëm një ditë i ndan nga shembja e shtëpive, banorët e “5 Majit” janë mbledhur këtë të hënë në protestë përpara bashkisë së Tiranës, ku kanë kërkuar një marrëveshje të drejtë për shpronësimet. E pranishme ishte edhe Laureta Nikolli së bashku me dy fëmijët e vegjël, ku foli për gjobën prej 13 mln lekësh të vjetër të vendosur pak ditë më parë nga bashkia, duke e konsideruar hakmarrje.

Më 22 shkurt, banorët e 5 majit janë lajmëruar për shembjet e radhës, të cilat pritet të kryhen në të dyja njësitë, 4 dhe 8. Ata kanë deklaruar se do të bëjnë rezistencë për të mos lejuar shembjet, edhe pse vazhdimisht janë përballur me dhunë policore.