Gazeta RD
Roman Abramovich është njëri prej njerëzve më të pasur në botë edhe pse kohëve të fundit po përballet me telashe të mëdha, shkaku i sanksioneve që i janë vënë atij dhe Rusisë kohëve të fundit.
Por, si arriti manjati rus ta bëjë gjithë këtë pasuri.
Gjiganti britanik “BBC” i ka zbuluar dokumentet e reja rreth pasurisë së parregullt të oligarkut rus, i cili e zotëron Chelsean.
Derisa është duke u munduar ta shesë klubin e tij, Abramovich vazhdon të jetë në sy të uraganit pas sanksioneve të vendosura ndaj tij nga qeveria britanike për lidhjet e tij me qeverinë ruse, e cila udhëhiqet nga presidenti Vlarimir Putin.
Por, këto nuk janë polemikat e vetme në të cilat është përfshirë oligarku rus, i cili e zotëron klubin nga “Stamford Bridge”.
“BBC” në fakt e ka zbuluar një sërë dokumentesh të e vërtetojnë parregullsinë e origjinës së pasurisë së Abramovichit, i cili është ende në bisedime me investitorë të ndryshëm për shitjen e Chelseat.
Sipas mediumit britanik, manjati rus i fitoi miliarda euro, ndonëse atë në mënyrë të pistë, duke e përfshirë këtu mashtrimin, korrupsionin dhe rrëmbimin.
Roman Abramovich, kështu e bëri pasurinë
Hetimi e ka nxjerrë në dritë një dokument prej pesë faqesh që ka mbetur nga arkivat e agjencive të policisë ruse.
Problemi i parë që e kishte Abramovich me gjykatën daton nga viti 1992.
Në atë kohë, ai e kishte grabitur një tren të ngarkuar me karburante për ta shitur më pas.
Sipas avokatëve të miliarderit rus, incidenti ishte thjesht një keqkuptim, raporton “BBC”, përcjell “Gazeta Express”.
Mirëpo, një shef i policisë së Moskës lëshoi urdhër arresti për të vetëm që çështja të zhdukej pa lënë gjurmë.
Zinxhiri britanik i mediave po ashtu i ka publikuar akuzat që e rëndojnë Abramovichin për korrupsion.
Ai e kishte blerë kompaninë “Sibneft”, për të cilën kishte nevojë për ndikim politik, të cilin nuk e kishte në atë kohë.
Sipas Boris Berezovsky, një tjetër oligark rus, pronari i Chelseat ia kishte dhënë atij më shumë se 10 milionë funte për t’ia paguar Alexander Korzhakov, atëherë njeri i fortë në qeverinë e Boris Yeltsinit.
Plani i Abramovichin funksionoi dhe ai e bleu kompaninë e sapokrijuar “Sibneft” si pjesë e nja ankandi të manipuluar.
Blerja e ‘Sibneft” ishte hetuar në atë kohë nga parlamenti rus në vitin 1997 dhe rasti kishte përfunduar deri tek hetuesit e departamentit të krimeve ekonomike.
Sipas këtyre hetuesve, nëse Abramovich do të sillej në gjyq, do të përballej me akuzat për mashtrim, si pjesë e një grupi të organizuar kriminal.
Por, kjo nuk ndodhi kurrë.
Sipas dokumentit të “BBC”, Abramovich e kishte mbështetjen e presidentit të atëhershëm rus.
Madje, presidenti Yeltsin e shkarkoi nga detyra ish-prokurorin e shtetit, Yuri Skuratov, i cili po merrej me këtë çështje.
Një tjetër akuzë për manipulim dhe përfshirje në rrëmbim
Në dokumentet e “BBC” flitet edhe për një ankand tjetër të manipuluar nga manjati rus për ta blerë kompaninë rusë të naftës “Slavneft””.
Abramovich e kishte krijuar një partneritet me një firmë tjetër në përpjekje për ta blerë kompaninë.
Por, hasi në problem pasi një kompani kineze e ofronte pothuajse dyfishin e parave për ta blerë kompaninë.
Dokumenti siguron se një anëtar i delegacionit kinez ishte kidnapuar kur kishte zbarkuar në Moskë për ankand.
Kompania kineze “CNPC”, një konkurrente shumë e fortë, u detyrua të tërhiqej nga ankandi pas rrëmbimit të njërit prej përfaqësuesve të saj.
Ai u lirua vetëm pasi kompania në fjalë e deklaroi zyrtarisht tërheqjen e interesimit për ta blerë kompaninë.
Avokatët e Abramovichit edhe në këtë rast i kanë thënë “BBC”-së se miliarderi rus nuk është në dijeni dhe nuk ka lidhje me këtë rast dhe se nuk ka bazë për ta akuzuar atë.
Edhe gjyqtarët përgjegjës për mbrojtjen e interesave të Abramovichit, i mohojnë akuzat për korrupsion ndaj klientit të tyre.
Sidoqoftë, shumë shpejt Abramovichit mund t’i ngrihen të gjitha asetet përderisa Rusia është duke u munduar ta pushtojë Ukrainën.
