Bylykbashi flet për risitë e Statutit të ri të PD: I hoqëm pushtetet kryetarit dhe sekretarit…

Deputeti dhe anëtari i Komisionit të Rithemelimit, Oerd Bylykbashi i ka quajtur risitë e statutit të Partisë Demokratike, si instrumente për demokratizimin e partisë, pas një periudhe të gjatë vendimesh autokratike.

I ftuar në Euronews Albania, Bylykbashi tha se, statuti i ri i dha pushtet organeve kolegjiale me synim fuqizimin e anëtarësisë.

Sipas Bylykbashit, shembulli për procedurën që duhet ndjekur në vijim nga strukturat e PD-së është shkarkimi i ish-kryetarit Lulzim Basha.

Ndërkohë sa i përket fraksioneve, Bylykbashi shpjegoi se ato formohen duke krijuar një program ndryshe nga ai i partisë dhe merr mbështetjen e 15% e anëtarëve të Këshillit Kombëtar, degëve apo deputetëve të PD, që me numrat e sotëm i thonë 8 deputetë.

Bylykbashi: I Hoqëm pushtetet kryetarit, sekretarit të përgjithshëm që ai i kishte marrë gjatë këtyre viteve, ia dhamë organeve kolegjiale, kryesisë dhe kolegjit për fuqizimin e anëtarësisë, që ishte primare. Diçka tjetër është që ne sollëm referendumin.

Nuk është instrument për zgjidhjen e një krize të veçantë. Jep mundësi të lançosh program më të ndryshëm brenda partisë, ta ndiejnë veten në shtëpinë e tyre, ose të kthehen në shtëpinë e tyre.

Gjithashtu Bylykbashi thekson se statutit të ri, cakton anëtarësinë që të votojë për kandidatët e partisë për deputetë, kryetar bashkie dhe këshill bashkiak.

Përplasjet për drejtimin e partisë që vijojnë në gjykatë, sipas deputetit janë vetëm vonesa të një bashkimi shumë të nevojshëm, i cili ka rifilluar në bazë.

Bylykbashi: Janë anëtarësia që përcakton kandidatët dhe ne i dhamë provat në janar. Për 6 bashki u zgjodhën kandidatët nga anëtarësia. Nuk u imponua asnjë kandidat, nuk u përjashtua asnjë. Ka dhe një element tjetër; statuti i njeh votën edhe simpatizantëve, që nuk janë anëtarë.

Vetë kam shembuj se si po zgjidhen në funksione drejtuese në bazë kandidatë që kanë qenë deri në 6 mars në krahun e Bashës. Baza po e mbyll me shpejt këtë çarje që shkaktoi Lulzim Basha, qe përgjegjësi e tij por jo e atyre të tjerëve që besuan, se pse jo ky ka të drejtë.