Britania kërkon armatim të rëndë për Ukrainën

Sekretarja e Jashtme britanike, Liz Truss, do t’i nxisë aleatët perëndimorë që të furnizojnë Ukrainën me aeroplanë luftarakë, sipas një deklarate për shtyp nga zyra e saj.

“Ne nuk mund të jemi të vetëkënaqur – fati i Ukrainës mbetet në balancë”, ka thënë Truss.

“Dhe le të jemi të qartë – nëse Putin ia del, do të ketë një mjerim të paparë në të gjithë Europën dhe pasoja të tmerrshme në të gjithë globin. Nuk do të ndjeheshim më kurrë të sigurt. Kështu që ne duhet të jemi të përgatitur për një kohë më të gjatë dhe të dyfishojmë mbështetjen tonë për Ukrainën”.

“Armë të rënda, tanke, aeroplanë — duke gërmuar thellë në inventarët tanë, duke rritur prodhimin. Ne duhet t’i bëjmë të gjitha këto”, thuhet në deklaratë, raporton CNN

Ajo tha se arkitektura globale e sigurisë që ishte krijuar për të garantuar paqen dhe prosperitetin ka dështuar në Ukrainë dhe nevojitet një qasje e re.

Ky qëndrim i Britanisë së Madhe vjen derisa vendet e NATO-s po rrisin mbështetjen e tyre ushtarake për Ukrainën. Në një kthesë të madhe politike të martën, Gjermania njoftoi se do të furnizojë Ukrainën me tanke kundërajrore. Kanadaja dhe Britania e Madhe gjithashtu njoftuan se do të furnizonin më shumë armë të rënda.