Kreu i NATO-s i vendos vijën e kuqe Rusisë

Enton DOÇI (Lyon)

Sekretari i Përgjithshëm i NATO-s, Jens Stoltenberg ka folur për mediet spanjolle një muaj përpara se të mbahet samiti i Madridit nga vendet anëtare. Kreu i Aleancës thotë se në këtë samit do të shënohet harta e NATO-s për 10 vitet e ardhshme.

Stoltenberg vë në pah rrezikun që i kanoset kontinentit evropian nga rritja e kapaciteteve ushtarake nga Pekini.

“E pres me padurim samitin e NATO-s ku do të shqyrtojmë konceptet strategjike. Ai do të jetë një demonstrim shumë i fortë i unitetit mes SHBA-ve dhe Evropës. Kina po investon shumë në rritjen e shpenzimeve të mbrojtjes dhe ky është një problem i madh për ne. Pekini nuk e ka dënuar agresionin rus dhe ky është një realitet i ri. Në këtë samit në Madrid do të tregojmë se po i përshtatemi kësaj bote në ndryshim në mënyrë që të vazhdojmë të jemi shtylla themelore e sigurisë për aleatët e Evropës dhe Amerikës Veriore,” tha ai.

Ai shpjegon se NATO ende nuk e ka ndryshuar pozicionin e saj për të hyrë në luftë me Rusinë dhe shprehu besimin se Moska nuk do ngurrojë ta bëjë një gjë të tillë.

“Ne kemi përgjegjësinë të parandalojmë përshkallëzimin e konfliktit NATO-Rusi. Por ne në radhë të parë mbrojmë vetveten. Ne kemi rritur praninë tonë në kufi për t’i dërguar mesazhe të qarta Moskës. Nëse sulmohet një aleat i yni ne do të jemi aty për ta mbrojtur atë, por megjithatë jemi të sigurt se Rusia nuk do të sulmojë një vend aleat të NATO-s,” deklaroi Stoltenberg.

Duke komentuar vazhdimësinë e konfliktit në Ukrainë, zoti Stoltenberg thotë se nuk dihet se kur mund të përfundojë beteja, pasi ajo është e paparashikueshme, por qëllimet e Moskës për të marrë gjithë vendin kanë dështuar tashmë.

About Redaksia

Check Also

JD Vance: Soros dhe Obama vendosën të heqin Biden dhe të caktojnë Harrisin! Ky është kërcënim për demokracinë

Senatori JD Vance, i përzgjedhur si kandidat për zëvendëspresident nga republikanët, deklaroi në mitingun e …

Leave a Reply