Thirrja e Berishës: PD nga nesër në fushëbetejë

*FJALA E KRYETARIT TË PARTISË DEMOKRATIKE, SALI BERISHA NË MBLEDHJEN E KËSHILLIT KOMBËTAR TË PD*

Të dashur anëtare dhe anëtarë të Këshillit Kombëtar,

Kjo është një mbledhje procedurale në të cilën ne do të zgjedhim drejtuesit më kryesorë, nënkryetarët, Sekretarin e Përgjithshëm dhe sekretarët e Partisë Demokratike.

Unë mendoj se procedurat nuk duhet të na pengojnë as edhe një minutë për të parë realitetin dramatik shqiptar, pasi sot zhvillimet në këtë vend, tejkalojnë çdo lloj imagjinate. Sot, Shqipëria është tërësisht në duart e krimit. Vetëm ngjarjet e javës së fundit tregojnë se në Shkodër krimi dhe policia janë një dhe se krimi godet në çdo skaj të këtij qyteti sikundër në çdo skaj të vendit.

Ndërkohë dëshmitë e Dumanit, vrasësit serial të bandave të qeverisë të cilat dora-dorës do të bëhen publike, faktojnë lidhjet e këtyre bandave në nivelet më të larta të qeverisjes së sotme, faktojnë dominimin e tyre mbi shtetin mafioz të kryqëzuara më të dhënat e prokurorive të vendeve të Benelux-it, Shqipëria rezulton, ministrat, drejtorët e saj, prokurorët dhe gjykatësit e saj, rezultojnë tërësisht skllevër të krimit të organizuar, anëtarë të bandave më të rrezikshme të Europës.

Ndërkohë, ju e shihni se në mënyrë të papërmbajtur, shqiptarët shkasin çdo ditë e më thellë në varfëri dhe mjerim. Vetëm dy muajt e fundit, qeveria e Edi Ramës ka grabitur dhe plaçkitur nëpërmjet bordeve 300 milionë euro nga xhepat e shqiptarëve. Çka ka bërë sot që mbi 300 mijë fëmijë dhe të rinj shqiptarë të jetojnë në kufijtë e varfërisë dhe të varfërisë ekstreme.

I rrënuar, katastrofë paraqitet gjendja në fshatin shqiptar. Përveç faktit se fondet e përcaktuara në ndihmë të fermerëve shqiptarë janë të më ulëtat në rajon, por në rast se analizohen fondet të cilat shkojnë direkt tek fermeri, ato janë 20 herë më të pakta se në Kosovë, nga 63 euro për hektarë, që shkojnë për fermerët në Kosovë, tek fermeri shqiptar shkojnë vetëm 3 euro për hektarë dhe 40 euro për hektarë, vidhen nga qeveritarët.

Rinia shqiptare është në dëshpërim të madh.

Por në një kërcënim dhe rrezik madhor që mund të krahasohet vetëm me vitin 1945 është çështja kombëtare. E vërteta është, Edi Rama, ky vasal i Aleksandar Vuçiç ka shndërruar Tiranën kryeqytetin e Shqipërisë, por edhe të shqiptarëve në Beogradin e vogël. Tirana e Edi Ramës dhe Banja Luka e Dodikut, kanë qëndrim identik për vrasjet, masakrat, gjenocidin, krimet kundër njerëzit që janë kryer në Kosovë gjatë operacionit ‘Patkoi’.

Një rezolutë që paraqitëm për të dënuar gjenocidin serb në Kosovë, gjenocidin e viteve 1998-1999, u refuzua nga Edi Rama, me pretekstin se ajo bie në kundërshtim me Ballkanin e Hapur, në të cilin Shqipëria është thjeshtë Beogradi i vogël. Në vitin 1945, Enver Hoxha, pasi me divizionet e tij, mundësoi vërshimin e hordhive serbo-malazeze në Kosovë dhe e dorëzoi atë tek Tito, akt të cilin e mbron edhe në vitin 1982 kur thotë “mirë bëmë”, Edi Rama po thur me Aleksandar Vuçiç plane të kobshme për Kosovën dhe shqiptarët në Kosovë. Të refuzosh dënimin e gjenocidit serb në Kosovë në kuadrin e operacionit ‘Patkoi’, do të thotë si një antishqiptar i vërtetë të vrasës për së dyti, të masakrosh, të përdhunosh, të kryesh ato barbari që ngjiten në nivel gjenocidi edhe njëherë ndaj shqiptarëve në Kosovë.

Pse u ndala unë në këtë analizë?

Sot, shqiptarët, jo vetëm në Shqipëri, në Kosovë, në diasporë kudo që ndodhen, sytë mendjen, zemrën e kanë tek veprimi i Partisë Demokratike, tek qëndrimi i Partisë Demokratike. Ata kërkojnë nga ne të jemi sot më në këmbë se kurrë, të mos pranojmë më kurrë këtë plaçkitje makabër, çnjerëzore që iu bëhet qytetarëve të varfër me bordet dhe klientelën e Edi Ramës. Ata kërkojnë që ne të luftojmë për kafshatën e tyre, të mbrojmë ata nga një klikë plaçkitëse që nuk ka asnjë qëllim tjetër përveç pasurimit të vet. Ata kërkojnë nga ne t’i dalim zot interesit kombëtar, t’i dalim zot vendit, t’i dalim zot kryeqytetit dhe të mos pranojmë kurrë që Tirana të shndërrohet në Beogradin e vogël për shqiptarët. Ata kërkojnë nga ne që të mos pranojmë kurrë që Edi Rama ky vasal i Vuçiçit, ky Duman i pushtetit, të shkelmojë mbi gjakun, sakrificën e mbi 10 mijë fëmijëve, grave, burrave, të rinjve shqiptarë në Kosovë dhe nuk po flasim as për vitet ‘874, as për vitet 1912-1913, as në vitin 1945, por të gjitha këto në vitin 1998-1999.

Ka një thirrje, ka një kushtrim për çdo shqiptar, t’i dalim zot interesit tonë kombëtar, sepse pikërisht se nuk është mbrojtur ky interes, Shqipëria është rrokullisur dhe rrokulliset çdo ditë. Asnjë interes tjetër i qytetarëve shqiptar nuk mund të mbrohet para se mbrohet interesi kombëtar i tyre.

Ju jeni forumi udhëheqës i Partisë Demokratike, është e domosdoshme që të fillojë menjëherë, të fillojë që nesër një debat për të gjitha këto zhvillime, partia duhet të dalë në fushëbetejë, nuk mundet kurrë kush të lozë me fatet e shqiptarëve. Nuk mundet kurrë kush të barazojë Tiranën me Banja Lukë apo ta shndërrojë atë në Beogradin e vogël. Nuk mund të ndodhë kjo, nuk mundet kurrë kush asnjëherë të mbajë në këmbë një Parlament që mohon gjakun e derdhur të shqiptarëve në Kosovë.

Çfarë presim ne, të shndërrohemi në shtojcë e Beogradit? Çfarë presim ne? Çfarë presim atdhetarët, patriotët shqiptarë, më shumë se sa t’u thuhet nuk pranojmë dënimin e gjenocidit në Kosovë sepse nuk na lejon Vuçiçi me Ballkanin e Hapur? Situata është më alarmante se kurrë, është emergjente. Unë e kuptoj se partia ka shpenzuar dhe konsumuar energji të mëdha në procesin e saj të brendshëm, por një gjë, në këtë proces, pavarësisht nga të gjitha presionet, pavarësisht nga të gjitha ndërhyrjet u konfirmuam dhe u rikonfirmuam mbi 44 mijë luftëtarë, të cilët iu përgjigjën çdo thirrje, çdo thirrje të Partisë Demokratike.

E kam thënë dhe e them, kjo është një shifër shumë e madhe dhe në proporcion është ndër më të mëdhatë për një Parti Demokratike. Ndaj dhe, sot votojmë këtu, nesër dhe ditët më të para të javës, kërkoj nga drejtuesit e degëve të mbledhin me urgjencë kryesitë, të mbledhin me urgjencë seksionet e Partisë Demokratike dhe të zhvillojnë një debat të hapur politik me to. Ne kemi sot një anëtarësi me ideale të larta, me pjekuri të madhe politike, me përgjegjësi të madhe politike, të gatshme për t’iu përgjigjur çdo sfide. Nesër Edi Rama firmos me votat e vjedhura pushtetin e tij 100% në Shqipëri. Zgjedh kukullën e tij.

Pra, zhvillimet janë dramatike.

Por qëndrimi ynë duhet të jetë gjithashtu më i vendosuri, më i fuqishmi që kemi treguar ndonjëherë ndaj një regjimi armiqësor, autokratik, të inkriminuar nga i pari tek i fundit në këtë vend, siç është regjimi i Edi Ramës.

Unë kam besim të madh tek anëtarët dhe simpatizantët tanë se s’do pranojnë kurrë këtë plaçkitje të paskrupullt, të pangopshme të qytetarëve shqiptarë, s’do pranojnë kurrë këtë shkelmim para botës së qytetëruar të interesave jetike kombëtare të shqiptarëve. Ata që mohojnë gjenocidet janë kriminelë, ata shkelin ligje kombëtare dhe ndërkombëtare, ndaj dhe ne duhet të ngrihemi sa më shpejt, dhëmb për dhëmb deri në triumfin e interesit tonë kombëtare, të vlerave demokratike.

Nëse do të vazhdojmë kështu, do rikthehet Druze Sandri, si dikur Druze Tito. Ne nuk mund të pajtohemi. Sandri është një kriminel që vendin e ka në Hagë dhe jo promotor i projekteve ruse dhe të serbomadhisë në Ballkan.

Ndaj dhe e mbyll këtë fjalë timen duke shprehur besimin më të madh tek ju, tek mbarë anëtaret dhe anëtarët e Partisë Demokratike, se në këto rrethana do i përgjigjemi me vendosmërinë më të madhe kushtrimit që buron sot nga shpirti, zemra e çdo shqiptari atdhetar që e do këtë vend!

Faleminderit shumë!

About Redaksia

Check Also

Berisha: Metamorfoza e Altin Dumanit, krahasime mes Task-Forcës së 2008-2009 me SPAK 2022-2023

Kryetari i Partisë Demokratike, Sali Berisha në një deklaratë për mediat, ka bërë një krahasim …

Leave a Reply