Gazeta RD
Kryetari i PD, Sali Berisha, gjta fjalës së tij në 32-vjetorin e themelimit të degës së PD në Durrës përkrah Igli Carës, kandidatit të dalë nga primaret për bashkinë e këtij qyteti, tha se, beson tek fitorja në 14 Maj.
Berisha u kërkoi demokratëve që të injorojnë grupimin e Alibeajt që janë në shërbim të Edi Ramës.
“T’i lëmë ata që s’duan, që janë në shërbim vetëm të Edi Ramës, të shkelmojnë mbi veten e tyre dhe dinjitetin e tyre. Zgjidhje fatale!”, tha Berisha.
Berisha u ndal gjatë kur u kthye pas në kohë, 32 vite më parë për të risjellë historinë e rrëzimit të regjimit komunist që e sheh të mëshiruar tek qeveria aktuale.
Berisha tha se, Rama po bën gjenocid për largimin e detyrueshëm të të rinjve. “Kjo që po bën kjo qeveri është absolutisht gjenocid ndaj shqiptarëve”.
Berisha nuk e vlerëson paketën mbështetëse të qeverise si ndihmë reale për shtresat që e përfitojnë. Kreu i PD e vlerëson si paketë mëshire e që për të në buxhet do të kishte hapësira të pafundme për të zbutur inflacionin nëse nuk do të abuzohej dhe do të vidheshin paratë nga zyrtarët dhe qeveritarët e kësaj shumice.
“Pensionistët nuk kanë nevojë për mëshirë. Mos vidh. Hiqe dhomën e gjumit nga avioni personal. Dhe do shohësh se do mbeten dhjetëra miliona euro. Mos vidh që zyrtarët e tu të mbushin dyshekët dhe tubat e aspirimit me paratë e shqiptarëve”, u shpreh Berisha.
