Gazeta RD
Kandidati i opozitës për bashkinë e Durrësit, Igli Cara dëgjoi sot shqetësimin e madh të qytetarëve që enden rrugëve pa shtëpi prej gati tre vjetësh, që nga tërmeti i 26 nëntorit 2019, pasi pallatet e tyre me të çara as nuk kanë nisur të rikonstruktohen nga i ashtuquajturi “Rindërtim”. Të ngrirë “si mishi në frigorifer”, qe krahasimi që përdorën këta banorë për hallin e tyre që askush nuk i ka dhënë zgjidhje.
“Të ngrirë në kohë ndihen banorët e ndërtesave të dëmtuara nga tërmeti, ende pa një zgjidhje, edhe sot e kësaj dite, – vërejti Cara në shënimin e tij në Fb duke treguar gjendjen e ndërtesave.
“Të dëmtuar jo vetëm prej tërmetit por, edhe prej babëzisë për fitime të shpejta nga oligarkë e ndërtues me shpatulla të ngrohta prej “vëllait” Kryeministër, duke ndërtuar jashtë çdo standardi.
Të lodhur e të munduar prej ecejakeve pa zgjidhje nëpër zyra të shtetit, të prokurorisë dhe të bashkisë, ku përballen me arrogancën, absurditetin, korrupsionin dhe paaftësinë endemike, me vështirësitë e mbylljes së muajit dhe një bonusi qiraje të pamjaftueshëm, me pasigurinë për fatin e familjeve të tyre.
Nuk janë të vetmit në Durrës, të cilët vuajnë në kurrizin e tyre papërgjegjshmërinë e një qeverisjeje, që meriton të ndëshkohet me votën tonë – qytetarë të ndershëm dhe punëtorë të Durrësit dhe gjithë Shqipërisë”, theksoi Cara në përfundim.
