Gazeta RD
Protesta e banorëve të fshatit Bërxullë për kompensimin e drejtë të tokave të tyre ka agravuar. Këtë radhë janë ulur zonjat e fshatit në rrugë dhe e kanë bllokuar, ndërkohë që Policia ka rrethuar zonën.
Gratë i bënë thirrje Qeverisë dhe ministres së Industrisë, Belinda Ballukut në veçanti të vijnë dhe të flasin me ta për kompensimin dhe akuzuan zyrtarët e lartë të shtetit për korrupsionin në legalizime e shpronësime.
“Çfarë bën ky shtet, çfarë bën kjo qeveri?! – tha zonja e ulur në shesh. – Vetëm hajdutë. Po këtu nuk do të lejojmë asgjë. Edhe banesat pa legalizim thotë nuk do të marrin asnjë lek. Banesat të palegalizuara i kanë lënë vetë sepse duan lekë që të bëjnë letrat. Po s’pate 5 mijë euro në xhep, nuk bëhen as letrat e tokës, as letrat e shtëpisë. Populli s’ka lekë të hajë bukë.
E ka çuar deri në atë pikë sa po shkojnë në vetëvrasje. Ne do të marrim akte edhe më të rënda. Unë benzinën me vete e kam këtu dhe Policia nuk ka asgjë çfarë të më bëjë. Edhe të vijë agjenti e të ma marrë se këtu me vetë e kam dhe shkrepësen. Të vijë e të ma marrë. Benzinë është e do ta përdor ku të dua. Jam nënë 63 vjeçe, heroinë si Shote Galica. Çfarë shteti është ky?! Po vini e na shtyni ne këtu në rrugë, por do t’i zëmë të tëra anët se toka e fshatit tonë është!”
