Gazeta RD
Nga Tritan SHEHU
Të tre, Vuçiç, Rama e Kovacevski u mblodhën në Verona për panairin e “verës”.
E ndoshta nën efektin e asaj pije Vuçiç bën një deklaratë provokuese, agresive.
Pikërisht si një formë e dhunëshme presioni mbi qytetarët e rajonit tonë.
E tipit komunist a fashist ajo:
“Doni një Ukrainë të dytë”?!
Dhe dy të tjerët heshtin!
Sikur fati i Ballkanit Perendimor, paqja a lufta në atë, jeta apo vdekja per banoret e tij, varet nga vullneti, humori, dashuria apo urrejtja e ketyre të tre….!
Dikush duhet tu shpjegojë atyre se tashti Greqia, Shqipëria, MV, Mali i Zi, jane antare të NATO në Ballkanin Perendimor.
Greqia është anëtare e BE dhe vendet tona janë në rrugën e integrimit të plotë në Europën e Bashkuar.
Italia është vetëm 60 km larg nesh!
Se në Kosovë ka forca të konsiderueshme të NATO e të ShBA, e cila tregon një vemendje e kujdes të veçantë për Rajonin tonë.
Se Brukseli e Gjermania po shtyjnë me forcë në aplikimin e Procesit të Berlinit, që e ka hedhur në harresë, në varr, Ballkanin e Hapur të Vuçiç.
Sado ata të tre të përpiqen ta kthejnë në jetë atë nën avujt e verës.
Dhe largimi nga Ballkani i hapur përkthehet qartësisht në largim nga hegjemonia serbe politike e ekonomike kjo.
Pra dhe nga influencat e vartesitë ruse, që për Vuçiç janë thelbësore.
Duke konsoliduar keshtu paqen, stabilitetin, bashkëpunimin e vertetë Rajonal, si pjesë e procesit tonë të integrimit.
Sepse luftën në Ukrainë e filloi dhe e mban të gjallë agresioni rus dhe vetëm ai.
Askush tjetër!
Eshtë pikërisht ajo influencë jetike ruse për Serbinë, që nuk e lejon atë as të normalizojë marrëdheniet me Kosovën, as të firmosë për paktin Franko-Gjerman.
Prandaj në vend që të “shijojnë” verën, që u krijoka efekte jashtë realitetit, të zbresin në “tokë” për të kuptuar se paqen e stabilitetin në Rajon e garantojnë ato faktorë, që përmenda më sipër.
Dhe jo tentakulat e Rusisë nëpërmejt Ballkanit të Hapur serb.
