Kryetari i PD në Vaun e Dejës, Benard Ndreca pasi e konsideroi qartësisht politik sulmin që iu bë me eksploziv atij vetë mëngjesin e kësaj të marte në automjetin e tij, i bëri një thirrje Kryeministrit, Ministrit të Brendshëm dhe kreu të Policisë së Shtetit të distancojnë Policinë nga politika.
Gjatë një deklarate sot nga vendi i ngjarjes, Ndreca përcolli një mesazh nëpërmjet medieve për Ramën, Çuçin dhe Rrumbullakun.
“Thirrja është, duke filluar që nga Kryeministri, Ministri i Brendshëm, që nga Drejtori i Përgjithshëm, të distancojnë Policinë nga politika, sepse në zonën e Vaut të Dejës dihet se gjithmonë përzihet policia me politikën! Distanconi policinë nga politika! Lërini njerëzit të votojnë të lirë, të votojnë vullnetin ku duan vetë! T’i lënë presionet! I bëj thirrje çdo lloj krahu politik t’i lënë presionet sepse vullneti i njerëzve dihet se ku shkon. Kurrë nuk mundet me e mbajtë një bashki apo një institucion, as me presione dhe me asgjë tjetër!”, deklaroi Ndreca.