Berisha: Me lopatë në dorë Rama po bën gropën e tij politike. Me 14 maj do të marrë faturën që meriton

Kryetari i PD, Sali Berisha tha nga Devolli se, Rama po bën gropën e tij politike. Me 14 maj do të marrë faturën që meriton.
“Tani çfarë bën, çfarë bën. Mashtrime, mashtrime dhe vetëm mashtrime. Ka kapur lopatën, të cilën e përçmon, ai përçmon njeriun e punës, sepse po të kishte respekt për ju, po të kishte respekt për fermerin, po të kishte respekt për biznesmenin, po të kishte respekt për mjekun, për mësuesin, nuk i katandiste në këtë gjendje.
Jo dhe jo, por tani me lopatë vetëm për të ju mashtruar ju.
I thoni të heqë lopatën dhe të sjellë kandidatin këtu, bashkë me Elvisin të dalin para jush. Por kanë frikë se i del kunati rrogë madh, se del vetë me dy rroga. Nuk dalin dot në asnjë ballafaqim. E kërkoj, i them unë hajde në ballafaqim Edvin, hajde të të tregoj pak tenderat e baxhanakut, tenderat e thjeshtrës, të tregoj pak vjedhjen që po bën djegësat 420 milionë euro. Të të tregoj pak ç’po bën me Portin e Durrësit.
Jo, jo nuk vjen, me lopatë duke hapur një gropë. E vërteta është, dua ta them sot, se s’po bën gjë tjetër, vetëm gropën tënde politike, me 14 maj do të marrësh faturën që meriton”, tha Berisha.