Policia e Kosovës kontroll në pronat e Radojiçiç

Policia e Kosovës ka njoftuar se sot është duke kryer pesë kontrolle në tri komunat në veri të Kosovës. Sipas burimeve, shënjestër e këtyre kontrolleve janë edhe pronat e nënkryetarit të Listës Serbe, Milan Radojiçiç.

Në njoftimin për media thuhet se këto urdhër kontrolle po zbatohen në koordinim me EULEX-in dhe KFOR-in.

Prokurori special Naim Abazi ka thënë se aksioni i Policisë së Kosovës të premten është zhvilluar kryesisht në pronat të cilat tanimë janë evidentuar si prona të të dyshuarit Milan Radoiçiç.

Në një prononcim për “Betimi për Drejtësi”, Abazi tha se aksioni është bërë me kërkesë të Prokurorisë Speciale e me urdhër të gjykatës kompetente.

“Ky aksion është bë me urdhër të Gjykatës, me kërkesë të kësaj Prokurorie në pesë lokacione të ndryshme në komunat e pjesës veriore të Kosovës. Kryesisht në pronat të cilat tanimë janë të evidentuara si prona të të dyshuarit Milan Radoiçiç, ndërsa sa i përket rezultateve ose gjërat që kemi gjetur në këto lokacione, provat qoftë ato materale dhe ato sendeve të cilat ne konsiderojmë të sekuestrohen do t’ju njoftojmë me kohë pemës një kumtese nga zëdhënësësit e kësaj Prokurorie”, tha Abazi.

I njëjti shtoi se janë duke i evidentuar pronat të cilat dyshohen se janë në emër të Radoiçiçit dhe personave të tretë ku ai i ka transferuar ato prona.

“Gjithçka që i përket operacionit dhe çështjeve të realizimit sa i përket kësaj urdhërese është përkujdesë Policia e Kosovës me detaje. Ne jemi ende tu i evidentuar pronat të cilat dyshohet se kanë qenë në emër të tij apo personave të tretë ku ai ka transferuar këto prona, por për rezultatin e tyre më saktësisht do t’ju njoftojmë në një njoftim të radhës pasi të përfundon në tërësi operacioni”, tha Abazi.

Ndryshe, Policia e Kosovës ka konfirmuar se aksioni është kryer në katër prej pesë lokacioneve ku po zhvillohen bastisjet.

About Redaksia

Check Also

Çfarë fshihet pas dëshirës së mistershme të Rusisë për të negociuar?

Agjencia “Reuters”, duke iu referuar burimeve të saj në Kremlin, solli lajme bombastike nga Moska. …

Leave a Reply