Gazeta RD
Deputetët e opozitës kanë bllokuar dyert e sallës ku zhvillohet mbledhja e Konferencës së Kryetarëve. Të bërë gardh para dyerve, ata nuk lejojnë kreun e grupit parlamentar të Partisë Socialiste, Bledi Çuçi për të hyrë në ambientet e brendshme.
“Turp të keni që na keni përjashtuar”, dëgjohet midis të tjerash në video.
Deputetët e opozitës shprehen se nuk po i lejojnë të futen në asnjë sallë dhe se kolegët e tyre socialistë synojnë të gjejnë salla alternative për të zhvilluar mbledhjen.
Në mbledhjen e sotme të konferencës së kryetarëve pritet të miratohet buxheti për vitin e ardhshëm, ndërsa i pranishëm do të jetë edhe ministri i Financave, Ervin Mete.
Kryetari i grupit parlamentar të PD, Gazment Bardhi u përplas me kryetaren e Kuvendit, Lindita Nikolla.
Bardhi i kërkoi llogari për përjashtimin nga punimet e Kuvendit. “Për ça më ke përjashtuar? Ça kam bërë që jam përjashtuar… Si qenka kjo rregullore? Po ti ke dy muaj që merresh me mua…”, dëgjohet Bardhi.
