“Çakenj të Ramës”/ Berisha: Zef Brozi dhe Kreshnik Spahiu janë figurat më të zeza të historisë së drejtësisë!

Lideri i opozitës, Sali Berisha në deklaratën të tij përpara gazetarëve ka theksuar një dallim të rëndësishëm ndërmjet protestave opozitare dhe atyre që, sipas tij, mbështeten nga administrata shtetërore, duke i cilësuar këto të fundit si një përpjekje për grusht shteti. Ai i referohet protestave si një shprehje e të drejtës demokratike të qytetarëve për të shprehur pakënaqësinë, ndërsa veprimet e qeverisë ndaj institucioneve të drejtësisë i konsideron si një tentativë për të kontrolluar pushtetin gjyqësor.

Në një tjetër pjesë të fjalës së tij, Berisha ka kritikuar ashpër individë si Zef Brozi, duke e quajtur atë një “turp të njeriut dhe të drejtësisë”, për shkak të veprimeve të tij si kryetar i Gjykatës së Lartë, të cilat, sipas tij, kishin për qëllim shmangien e zbatimit të vendimeve të gjykatës.

“Dallimi i protestës opozitare me protestën qeveritare, para një institucioni shtetëror, është dallimi midis ushtrimit të të drejtës demokratike të protestës dhe ushtrimit të grushtit të shtetit. Kjo është esenciale, të themi atë që është.

Për protesta, ju po të bëni një ritual gjeni me qindra protesta, para Gjykatës së Lartë në SHBA, para Gjykatës së Apelit, protesta të njerëzve që janë të pakënaqur me një gjykim apo me një çështje apo që duan të dëgjohet zëri i tyre, janë një gjë e zakonshme, nuk kanë lidhje me asnjë lloj përmbysje.

Kurse protestat e administratës shtetërore, të ekzekutivit kundër pushtetit gjyqësor, janë shprehje absolute e përpjekjes për grusht shteti për të marrë pushtetin e drejtësisë…

…Meqenëse u riktheve te një person si Zef Brozi, unë mund t’u them ju se ai ishte turpi i njeriut dhe turpi i drejtësisë.

Çfarë ishte ai?

Merrej një vendim, vendoste gjykata, dhe pasi kishte vendosur trupa gjykuese, jo në një, por në shumë raste, kryetari lëshonte pusullën, ky vendim të mos zbatohet.

Pra, kryetari ishte një delinkuent i paimagjinueshëm.

Kryetari i Gjykatës të Lartë, që duhej të ishte njeriu që të insistonte për zbatimin e vendimeve të gjykatës, ky lëshonte pusulla ‘mos zbatoni këtë vendim’, kundrejt pagesave ose jo, nuk mund të them, por pusullë të tillë nuk mund të lëshonte kurrë.

Pra, ishte ky person që kryente një akt antikushtetues dhe nuk është bërë asnjë protestë para tij, por është nxjerrë jashtë dhe është bërë me prokurori, është ndjekur procesi për ta çuar atje ku e kishte vendin.

Një këshillë, të investoni në tipa si Zef Brozi apo Kreshnik Spahiu, duhet të ndjeheni të turpëruar po të ndodheni afër tyre.

Pse? Në kohën kur kishte Këshillin e Lartë të Drejtësisë ky turp-njeri, Komisioni Europian bënte raportin se për t’u transferuar nga Durrësi në Tiranë, duhet të paguajë gjykatësi 200 mijë euro.

Se për t’u emëruar në Tiranë, duhet të paguajë gjykatësi 300 mijë euro.

Prandaj dhe këta turpe, në vend që të shkojnë dhe të përballen me drejtësinë atje ku duhet, rrinë dhe plotësojnë, bëhen çakenj të Edi Ramës nga ekrani në ekran tjetër. Nuk ka figura më të zeza në historinë e drejtësisë se këta që thashë”, tha Berisha.