Gazeta RD
Demokrati Sali Berisha vazhdoi konferencën duke akuzuar Edi Ramën për shkelje të ligjit dhe Kushtetutës, duke përdorur bonusin elektoral për të manipuluar votat. Ai e quajti këtë një akt turpërues, i cili synon të blejë mbështetje në prag të fushatës elektorale.
Berisha siguroi pensionistët se, përveç rritjes së pensioneve, ata do të pajisen me kartën e konsumatorit që do t’u mundësojë rikthimin e TVSH-së që paguajnë për produktet e përditshme.
“Së dyti, Edi Rama po spekulon në kundërshtim me ligjin, në kundërshtim me kodin elektoral, me Kushtetutën, me bonusin elektoral të pensionistëve.
Ky është një akt i turpshëm, një akt i cili synon të blejë vota në fushatë, që nuk e bën asnjë shtetar në botë përveç narkodiktatorit Edi Rama. Ai e bën këtë.
Me këtë rast, unë siguroj pensionistët se përveç rritjes së pensioneve që njoftova, çdo pensionist do pajiset me kartën e konsumatorit me të cilën ai do marrë 450 euro në vit dhe nuk do jetë bonus siç e quan Edi Rama, por do jetë rikthim i TVSH-së që ata paguajnë për çdo gjë që blejnë në jetën e tyre, duke filluar nga ilaçet, ushqimi, buka dhe çdo gjë tjetër.
Po, do bëhet kjo sepse nuk mund të tolerohet më tutje ky hendek i tmerrshëm që po e copëton shoqërinë shqiptare.
Në këto përmasa është tmerrësisht i frikshëm. Ndaj do jepen, fillimi do jetë karta e konsumatorit me 450 euro për çdo qytetar që merr minimumin jetik, për çdo pensionist dhe çdo rrogëulët.
Nuk mjaftojnë këto. Jo! Do të ulet çmimi i energjisë në 7 lekë për kilovat nga 85 që e sollën këta. Dhe do proporcionohen të gjitha qiratë e banesave sociale në përputhje me rrogën. Një rrogëtar me rrogë 700 mijë lekë, paguan 62 mijë lekë qira në banesë sociale. Një pension me pension 130 euro, paguan 62 euro për qira në ndërtesë sociale. Kjo merr fund. gjithçka do proporcionohet.
Në qoftë se pensioni është 4 herë më i ulët se rroga, 4 herë më e ulët do jetë pagesa e qirasë së tij. Nuk mund të trajtohen njerëzit si kavie laboratori. Jo!”, tha Berisha.
