Tre kamikazë certifikojnë mbushjen e kutive të 11 majit/ PD: Nuk i njohim zgjedhjet

Të nderuar anëtarë të Komisionit Rregullator,

Në cilësinë e përfaqësuesit ligjor të Partisë Demokratike-Aleanca për Shqipërinë Madhështore, sot kam detyrimin të deklaroj qartë se zgjedhjet e 11 majit 2025 ishin zgjedhjet më të plaçkitura dhe më të deformuara në 33 vite pluralizëm.

Këto zgjedhje nuk ishin thjesht të manipuluara; ato ishin një farsë elektorale e kryer publikisht, me gjithë mekanizmat e shtetit në veprim, duke shkatërruar thelbin e votës së lirë, duke tjetersuar vullnetin e një pjese të konsiderueshme të elektoratit, duke prekur shtresat vulnerable, duke shtuar klientelizmin (“më jep votën, të jap një privilegj, vend pune, apo tolerim ndaj paligjshmërisë”), duke frikësuar dhe, pse jo, duke manipuluar e tjetersuar me çdo formë e mënyrë vullnetin e qytetarëve shqiptarë.

Manipulimet flagrante të pushtetit

1. Shpërndarja e fondeve publike për blerjen e votës. Në mes të fushatës, qeveria shpërndau 70 milionë euro si “dhuratë” për 760 mijë pensionistë, të cilët përbëjnë gati gjysmën e votuesve në Shqipëri. Ky është akti më i rëndë dhe më i paprecedent i blerjes publike të votës, i kryer me vendime qeveritare.

2. Fshirja masive e detyrimeve tatimore. Vetëm dy ditë para zgjedhjeve u falën mbi 200 milionë euro gjoba dhe kamata të mbledhura prej 10 vitesh. Ky veprim ishte një tjetër akt i qartë i blerjes së hapur të votës me paranë publike.

3. Shpërndarja e licencave të drogës për vota. Në mes të fushatës u dhanë 138 licenca për miliona bimë kanabisi. Të gjithë e dinë se një bimë kanabisi gjeneron 1 mijë euro fitim. Pra, ky ishte një akt i pastër korruptimi elektoral, ku qeveria i dha mafias së drogës mundësinë të konvertojë plantacionet në vota.

4. Rrethi vicioz: krimi shndërrohet në votë dhe vota në krim. Ky është thelbi i zgjedhjeve të 11 majit. Sa më i madh korrupsioni dhe vjedhja, aq më shumë ato përkthehen në votë për pushtetin, dhe pas tyre vota bëhet instrument i krimit. Ky është asgjësim i Kushtetutës, i Kodit Zgjedhor dhe i demokracisë.

Këto nuk janë pretendime politike; janë fakte të ndodhura, të kryera publikisht dhe të dokumentuara. Çdo përpjekje për t’i mohuar apo relativizuar këto krime zgjedhore është ose bashkëpunim.

5. Manipulimi i votës së diasporës

Një nga kapitujt më të zinj të farsës elektorale të 11 majit 2025 ishte vota e diasporës. Ajo që u konsiderua një arritje kushtetuese dhe një fitore historike për shqiptarët jashtë atdheut, u shndërrua në një tjetër krim elektoral nga narkoshteti. Në kundërshtim flagrant me Kodin Zgjedhor, me aktet që vetë Rregullatori ka miratuar, dhe me parimet ndërkombëtare të zgjedhjeve të lira, procesi u shtetëzua plotësisht dhe u vendos nën kontrollin e qeverisë. Pas kësaj, strukturat e pushtetit nuk treguan as përpjekjen më minimale për të fshehur ndërhyrjen e tyre në manipulimin e votës së diasporës.

Procesi i votimit nga jashtë u dominua dhe u deformua nga një rrjet i mirëorganizuar, i zbatuar nga patronazhistë të shpërndarë në Greqi, Itali dhe vende të tjera ku jeton diaspora shqiptare. Punonjës ambasadash dhe ish-punonjës të shërbimit diplomatik, si dhe punonjës të administratës vendore e qendrore, dyshohet se u angazhuan si ndërmjetës të manipulimit, duke shndërruar një të drejtë kushtetuese të qytetarëve në një farsë të re.

Rezultatet flasin vetë: modele të përsëritura artificiale ku Partia Demokratike dhe koalicioni i saj merrnin gjithnjë një numër të fiksuar votash nga 20 deri në 25 vota në çdo kuti me vota të diasporës, përballë qindra votave të Partisë Socialiste (nga 250 gjer në 377 për kuti, ose raporti shkon deri në 94% për PS dhe 4-5% për PD në raste flagrante). Këto shifra absurde, që përsëriten me të njëjtin skenar në disa kuti votimi në Fier, Vlorë, Berat, Gjirokastër, Elbasan, Korçë dhe zona të tjera, janë prova flagrante e një manipulimi të programuar, që organizatorëve u doli jashtë kontrollit.

Ne, PD-ASHM, kemi dorëzuar në KQZ, KAS, Kolegj apo organet ligjzbatuese qindra prova, indicje, grup-prova, dokumente dhe dëshmi për këtë krim elektoral ndaj votës së diasporës dhe të shqiptarëve brenda vendit, të konsumuar nga “Horrat Elektorale”. Por ato jo vetëm që nuk u morën parasysh, por u relativizuan dhe u shpërfillën.

Konstatimet e OSBE/ODIHR (Raporti i 12 majit 2025)

Raporti paraprak i misionit të OSBE/ODIHR konfirmon shumë nga ato që opozita ka denoncuar:

• Zgjedhjet u zhvilluan në një mjedis thellësisht të polarizuar dhe të pabarabartë.

• Pati keqpërdorim masiv të burimeve shtetërore nga partia në pushtet. Zyrtarë qeveritarë kombinuan aktivitetet shtetërore me mesazhe elektorale, ndërsa falja e gjobave shihet si përpjekje për të fituar mbështetje politike.

• Administrata publike u vu nën presion, punonjësit e shtetit u intimiduan dhe rrjetet e patronazhistëve u përdorën kundër standardeve ndërkombëtare.

• Fushata ishte e mbushur me diskurs polarizues dhe përmbajtje manipuluese, ndërsa ndalimi i TikTok nga qeveria kufizoi lirinë e fushatës online.

• Mediat ishin të përqendruara, të kontrolluara dhe të njëanshme. Gazetarët ushtruan autocensurë, ndërsa shpifja si vepër penale u përdor si instrument presioni.

• Financimi i fushatës ishte jotransparent, ndërsa KQZ nuk kishte instrumente efektive për kontroll.

• Ditën e zgjedhjeve pati shkelje të procedurave, frikësim të zgjedhësve, ndërhyrje nga partitë dhe blerje votash. Fshehtësia e votës u cënua; mbi gjysmën e qendrave nuk ishin të aksesueshme për persona me aftësi të kufizuara.

• Procesi i numërimit shpesh u zhvillua në mënyrë jo transparente dhe kaotike, me kufizim të vëzhguesve.

• Reforma zgjedhore mbetet e papërfunduar. Rekomandimet e OSBE dhe Komisionit të Venecias për mbulim mediatik të barabartë, transparencë financiare, dekriminalizim të shpifjes, nuk janë zbatuar.

• Besimi i publikut në integritetin e zgjedhjeve mbetet i ulët, ndërsa lidhjet e politikës me krimin e organizuar nuk janë adresuar.

Përfundim

Të gjitha këto tregojnë se zgjedhjet e 11 majit nuk ishin garë e lirë demokratike, por një operacion i mirëplanifikuar manipulimi, i kryer hapur dhe në sy të botës. Ne, PD-ASHM, deklarojmë se nuk i njohim si të ligjshme dhe as legjitime zgjedhjet për Kuvend të dalë nga 11 maji 2025.

Prandaj, në emër të Partisë Demokratike-Aleanca për Shqipërinë Madhështore, unë kërkoj zyrtarisht që Komisioni Rregullator të mos miratojë rezultatin përfundimtar të këtyre zgjedhjeve, sepse një miratim i tillë do të thotë legjitimim i një megakrimi elektoral dhe varrim i demokracisë shqiptare.

Ju, anëtarë të këtij Komisioni, sot jeni përballë një zgjedhjeje historike: ose do të bëheni pjesë e mbulimit të kësaj farse, ose do të qëndroni në anën e ligjit, të Kushtetutës dhe të demokracisë.

Ndaj, përfundimisht, kërkoj në emër të PD-ASHM që të mos miratoni rezultatin e 11 majit 2025!

Faleminderit,

Franci Nuri

Përfaqësues ligjor i Partisë Demokratike-Aleanca për Shqipërinë Madhështore

pranë KQZ