Përbindëshi që keni krijuar

Nga Grigels MUÇOLLARI

Kur dëgjova shpërthimin e Edi Ramës ndaj Mustafa Nanos, nuk pata shumë keqardhje, por shija që la pas kjo shfaqje njerëzore është ende aty.

Gazetari, analisti që ka kontribuar në ardhjen e Edi Ramës në pushtet, madje mund të quhet dhe ideologu i asaj teze të vitit 2013; të bashkohen gjithë qelbësirat për të larguar Berishën e për të sjellë Ramën, mori një linçim publik për qëndrimin e tij pas protestave.

Mustafa Nano paska thënë tani që janë mbushur sheshet dhe revolta ka shpërthyer, se Edi Rama duhet të largohet.

Në një sallë mbushur me militantë e patronazhistë, Kryeministri ngriti trekëndëshin dhe ekzekutoi Mustafa Nanon, duke i kujtuar atij nderin që i ka bërë, mënyrën si ai ia ka kërkuar. Mustafa Nano i qenka ulur në kolltuk në zyrë dhe i paska thënë Ramës ta çojë ambasador se qenka i lodhur me Shqipërinë.

Kryeministri punëmbaruar e dërgon në Zvicër, ambasador. Ai nuk kryen detyrën, e lë në mes mandatin, dhe kthehet e thotë në media që Rama duhet të largohet.

Kur ia bën këtë një njeriu publik që e ka pasur në rrethin e tij, i cili ka ndikuar në ardhjen e tij në pushtet, përfytyroni pak se çfarë është në gjendje t’i bëjë ai një njeriu të zakonshëm.

Edi Rama e quajti Mustafa Nanon edhe spiun të Sigurimit të Shtetit, publikisht, në mes të qytetit, live, faqe botës.

Kjo nuk tregon vetëm gjendjen e rëndë të Kryeministrit, destabilizimin e tij total. Por tregon se çfarë përbindëshi kanë krijuar publicistë e opinionbërës si Mustafa Nano, të cilët kanë meritën e tyre të padiskutueshme në rritjen deri në Kryeministër të Edi Ramës.

Tani atyre, Mustafa Nanos e shumë si ai, u lind detyra që të mblidhen edhe një herë kudo ku janë, të bëjnë një gjë të mirë, të korrigjojnë gabimin historik që kanë kryer ndaj vendit.