30 Gusht/ Dita Ndërkombëtare e të pushkatuarëve dhe të zhdukurve!

Sot Shqipëria duhet të përkulet me respekt para mijëra shqiptarëve që komunizmi i pushkatoi, i mbyti në burgje e kampe dhe më pas i zhduku pa varr.

Diktatura nuk u mjaftua t’u merrte jetën. Ajo u mohoi familjeve edhe të drejtën për të qarë mbi një varr. Eshtrat u fshehën, u groposën në vende të panjohura dhe shumë prej tyre ende nuk janë gjetur.

Ky nuk ishte thjesht një krim politik. Ishte një krim kundër njeriut, familjes dhe kujtesës kombëtare.

Dhe sot, pas më shumë se tri dekadash nga rënia e diktaturës, është e pafalshme që familjet ende kërkojnë eshtrat e të afërmve të tyre. Pushteti politik që trashëgon një pjesë të strukturave dhe mentalitetit të së shkuarës komuniste jo vetëm nuk ka bërë sa duhet për gjetjen e këtyre eshtrave, por shpesh ka treguar më shumë interes për ta relativizuar, zbehur apo harruar krimin komunist sesa për t’u përballur me të.

Disa prej atyre që kanë kryer këto krime, ose që mbajnë ende sekretet e tyre, jo vetëm që nuk tregojnë vendvarrimet e viktimave, por vazhdojnë të punojnë e të ushtrojnë funksione edhe në institucione shtetërore. Kjo është një plagë e hapur e drejtësisë shqiptare dhe një fyerje për familjet që prej dekadash kërkojnë eshtrat e të afërmve të tyre.

Komunizmi i vrau. Heshtja i zhduk për së dyti.

Ne nuk do të heshtim. Nuk do t’i harrojmë. Nuk do të pranojmë që krimet e diktaturës të mbulohen nga harresa, propaganda apo relativizimi historik.

Eshtrat e tyre duhet të gjenden. Emrat e tyre duhet të nderohen. Krimet e komunizmit duhet të njihen dhe të dënohen ligjërisht dhe moralisht nga shteti dhe shoqëria.

Sepse familjeve të tyre nuk u duhet më një premtim.

U duhet varri i të dashurve të tyre. U duhet e vërteta. U duhet drejtësia.

Lavdi kujtimit të të pushkatuarve dhe të zhdukurve të diktaturës komuniste!