Gazeta RD
Kryetari i PD, Sali Berisha deklaroi në Kuvend se, Taulant Balla ka lidhje me të penduarin e drejtësisë, Nuredin Dumani.
Nga foltorja e Kuvendit, Berisha iu drejtua Ballës që të tregojë se sa e ka paguar që vrasësin me pagesë, që ta nxjerrë atë të pafajshëm te Manahasat. Gjithashtu, Berisha tha se Balla ka mbi 100 telefonata me Nuredin Dumanin dhe bandën e Talo Çelës.
“Për parafolësin që s’dua t’i përmend emrin, kam një pyetje, sa i pagove Nure Dumanit për të të ‘shpëlarë’ tek Manhasat? Kjo do të dalë. Dhe nuk është vetëm kjo. Por ja ku po ua them të nderuara zonja, ai ka mbi 50-100 telefonata me Dumanin, me sharrën, me gozhdën dhe me bandën e Suel Çelës,Talo Çelës e të tjerë me radhë”, u shpreh Berisha.
Kryedemokrati foli edhe për marrëveshjen e ekstradimit me vendet e Benelux-it, të cilën siç tha ai, qeveria nuk e dërgon në Parlament, për arsye se ministra dhe deputetë rrezikojnë të ekstradohen në Belgjikë.
“Së pari, denoncoj qeverinë e cila nuk sjell në Parlament marrëveshjen e ekstradimit me vendet e Benelux-it. Dhe këtë nuk e bën për faktin e vetëm se të paktën 6 minsitra dhe shumë deputetë socialistë janë kandidatë për ekstradime”.
Berisha teksa ka kërkuar fjalën në Kuvend për të bërë replikë deklaroi se vendet e Beneluksit presin nga Shqipëria që të arrihet marrëveshja për ekstradimet.
Sapo kreu i PD, ka nisur që të flasë për këtë çështje, atij i është hequr mikrofoni nga zëvendëskryetarja e Kuvendit, Ermonela Felaj.
Debati
Berisha: Zotërinj deputetë, zonja deputete, të dashur qytetarë dhe qytetare, prej kohësh vendet e Beneluksit presin nga Shqipëria marrëveshjen e ekstradimit. Shqipëria nuk iu përgjigjet këtyre vendeve. Nuk i përgjigjet Belgjikës dhe vendeve të tjera për të firmosur në kohë…
Felaj: Kjo nuk është çështje për procedurë. Ky rend dite…seanca ka vetëm një rend dite. Çështjet e tjera nuk janë çështje procedure. Mos të bëjmë një debat të pavlerë.
