Reagim i PD Vlorë
Sot në universitetet shqiptare nisi viti i ri akademik 2022- 2023.
Uroj studentët e pedagogët në këtë fillim viti, por insistoj në shqetësimin, që ka të bëjë me mungesën e studentëve dhe rrezikun e mbylljes së shumë degëve e programeve akademike.
Shqetësimi është për gjithë universitetet shqiptare, por theksoj se Universiteti “Ismail Qemali” në Vlorë këtë vit të ri akademik po e nis me rreth 55% të kuotave të regjistrimit të studentëve të plotësuara.
Shifrat janë të përafërta, sepse nuk janë publikuar zyrtarisht, por gjithsesi kjo shifër, megjithëse ka ende disa ditë për t’u përmbyllur faza e tretë e regjistrimeve, është shifra më e ulët e studentëve të regjistruar në programet e studimit në vitet e fundit.
Degë të universitetit “Ismail Qemali”, si: mësuesia, fizika, kimia dhe matematika janë në kuota minimale të regjistrimit të studentëve duke rrezikuar mbylljen.
Dhe kjo është një këmbanë alarmi, e cila në rast se nuk merr zgjidhje do të ketë pasoja në dekadën e ardhshme.