Ministrja e pranon: Një nga kompanitë në Portin e Durrësit është sekret

Ministrja e Financave, Delina Brahimaj ka pranuar gjatë replikave me deputetin e PD, Agron Shehaj në Kuvend se një nga palët dhe përfituesit e Marrëveshjes për Portin e Durrësit është sekret.

Shehaj ‘gozhdoi’ me pyetje ministren e Ramës se kush janë pronarët e kompanisë ‘Nishmi Development’ dhe cila është xhiroja vjetore e saj.

Kompania në fjalë është themeluar vetëm një vit më parë, ndërkohë që nuk ka asnjë aktivitet dhe asnjë të punësuar.

Në reagimin e saj, Brahimaj konfirmoi se për këtë kompani ka një seksion konfidencial në kontratë dhe nuk mund të bëhet publike asgjë.

Debati në Kuvend

Agron Shehaj: Zonja ministre kush janë pronarët e kësaj kompanie. Keni një problem shumë të madh, në radhë të parë nuk dimë se kush janë pronarët dhe në radhë të dytë nuk dimë se çfarë xhiro vjetore kanë. Nuk kemi asnjë informacion. Mund të jetë si Eagle Hills që keni krijuar këtu me një kapital social prej 80 euro, mund të jetë e njëjta. Pse është e rëndësishme kjo? Sepse kur kryeministri e ka shpallur investitor strategjik e ka bërë duke marrë parasysh garancinë që jep kjo kompani.

Delina Brahimaj: Përsa i përket kompanisë ‘Nishmi’, në fakt është një seksion konfidencial i kontratës i cili është kërkuar nga ne për të shtuar sigurinë në këtë projekt.

Kujtojmë që një javë më parë Shehaj zbuloi në Kuvend kontratën me 100 faqe mes shtetit shqiptare dhe atyre që do të investojnë në Portin e Durrësit.

Shehaj tha se ndryshe nga sa u premtua prej tre vitesh se Durrësi do të bëhej Dubai i Europës dhe se kompania investuese do të ishte Emaar, tani është një kompani e krijuar vetëm një vit më parë, pa aktivitet dhe pa të punësuar. Kompania është pikërisht ‘Nishmi Developmet’.

“Kjo është kontrata koncesionare mes shtetit shqiptar dhe një subjekti që është i shtetit shqiptar, “Albanian Seaport Development” dhe “Eagle Hills Real Estate Development”, që është krijuar nga Mohamad Alabar para një viti, që e ka në pronësi se ka krijuar ndërkohë një kompani edhe në Abu Dhabi. Është një kompani që nuk ka aktivitet, nuk ka të punësuar, asgjë, që është i llojit Holding, thjesht për të zotëruar kuotat e kompanisë shqiptare. Subjekti tjetër është “Nishmi Development”, që është e kontrolluar pjesërisht nga ortakë offshore.

Këta janë subjektet me të cilët shteti shqiptar duhet të mbyllë një marrëveshje prej 2 miliardë eurosh, ku jep praktikisht 1 milion metër katrorë në Durrës. Pra shtetit shqiptar, Edi Rama, thotë se sot të mbyllim kontratë me njerëz që nuk janë. Gjëja më e rëndësishme është që Rama ka tre vjet që thotë që në Durrës do të investojë një nga kompanitë më të mëdha në botë, që zhvillon projekte të ngjashme, që është “Emaar”. Pasi tha 3 vjet se do të vijë Emaar, Emaar, do të bëjmë Dubain në Europë, bëhet marrëveshja midis shteteve dhe tani na del që Emaar nuk është asgjëkundi.

Pra ka tre vjet që thotë do të vijë kompani e madhe, prandaj nuk po e japim, prandaj po bëjmë një ligj special, dhe zbulojmë tani që marrëveshja nuk po bëhet me Emaar, por me një individ, i cili, para një viti krijoi disa komapni të ndryshme, që janë praktikisht bosh, pa kapital, pa të punësuar, pa historik. Pra jo vetëm që kemi dyshime për kushtet e marrëveshjes, kemi apo jo interes. Çfarë na garanton ne se pas këtyre kompanive nuk është vetë kryeministri apo ministrat?”, tha Shehaj.

About Redaksia

Check Also

Berisha: Ky regjim i shëmtuar bëri gjithçka që protesta jonë të mos zhvillohej, Rama kreu një akt prej krimineli

Kryetari i Partisë Demokratike, Sali Berisha ka folur për mediat edhe nga shkallët e selisë …

Leave a Reply

Your email address will not be published.