Ky 13 dhjetor shënon 32 vite nga dita kur në Shkodër u rrëzua busti i diktatorit Enver Hoxha, proces që parapriu rënien e regjimit diktatorial komunist në vendin tonë.
Kryetari i bashkisë Shkodër, Bardh Spahia, si dhe përfaqësues të shoqatës antikomuniste “13 Dhjetori”, morën pjesë në homazhet zhvilluar pranë memorialit kushtuar kësaj dite.
Ervin Gjini, Kryetar i Shoqatës Anti-komuniste “13 Dhjetori” shprehet se Shkodra nuk e ka lejuar regjimin diktatorial të privojë lëvizjen e studentëve të përhpej në të gjithë vendin
“Diktatura tentoj që lëvizjen e studentëve të tiranës ta kufizonte dhe ta mbante vetëm në atë qytet e mos të përhapej në të gjithë Shqipërinë, por qytetarët e Shkodrës nuk e lejuan këtë pjesë. Ata u ngritën dhe i ranë në një grusht të fortë bustit diktatorit” e shpreh Gjini.
Kryebashkiaku i Shkodrës Bardh Spahia, në një reagim në rrjetet sociale, shprehet se 13 dhjetori ishte një akt lirie dhe guximi përballë mizorisë së regjimit.
“32 vite më parë, Shkodra e dha shkëndijën e shpresës duke i dhënë një goditje të fortë regjimit komunist! Qyteti që nuk ju nënshtrua diktaturës, ishte i pari që në 13 dhjetorin e 1990-es, rrëzoi bustin e diktatorit Enver Hoxha. Jehona e thirrjeve: Liri Demokraci, Poshtë Enver Hoxha, Ky pushtet mori fund, Enver Hitler, Rroftë Amerika etj, kumbuan fuqishëm në mbarë Shqipërinë, duke u përhapur me shpejtësi. Ishte akt guximi, ishte revoltë e shpirtit të lirë të shkodranëve që ja dolën përballë mizorisë së një sistemi”, shkruan Spahia
Shkodra ishte ndër qytetet e para ku nisi revolta kundër sistemit komunist, që mbajti të izoluar Shqipërinë për 45 vjet.