Gazeta RD
Kryetari i PD, Sali Berisha tha se, unë besoj se Shqipërinë e shpëtojmë duke dhënë secili nga pak dashuri! Berisha bëri thirrje për të votuar më 14 maj, votoni ndryshimin!
“Unë besoj se Shqipërinë e shpëtojmë duke dhënë secili nga pak dashuri. Një vend që 10 vite që keqtrajtohet, shërohet vetëm me dashuri.
Nuk mund të presim më nga ndërkombëtarët, nuk duhet të presim nga një lider apo një parti politike.
Dashurinë më të sinqertë nënës mund t’ia japin vetëm bijtë e saj.
Unë besoj në një Shqipëri që drejtohet nga njerëz të ndershëm, të rinj, model, me qytetarë të barabartë përpara ligjit, që krijon kushtet për t’i rikthyer qytetarët në atdheun e tyre.
Unë besoj në një Shqipëri që shtohet në popullsi, me familje të gëzuara, me një qeveri të vogël dhe të përulur përpara qytetarëve.
Unë besoj se ka ardhur koha për këtë Shqipëri. Të lëmë mbrapa Shqipërinë e krimit, drogës dhe vjedhjes.
Kjo është një aspiratë që e shoh në zemrat e secilit prej jush.
Të sigurt të jeni ju se po realizuam këto, Europa do na hapë dyert njësoj siç bëri NATO.
Europa nuk do propagandë, ajo do vepra. Ne demokratët e kemi provuar se kemi vepra dhe dimë të flasim me vepra.
Ndryshimi është në duart tuaja, bashkë fitojmë!
Thirrje për 83 përqind e shqiptarëve që duan të largohen nga Shqipëria është: jepini një shans Shqipërisë, jepini një shans!
Votoni më 14 maj, votoni ndryshimin”, tha Berisha.
